“Андижон” жамоасининг душанба кунидан бошланган иккинчи йиғини давом этмоқда. Кеча машғулотларнинг иккинчи куни бўлиб ўтди.

Айтиш керакки, кечадан бошлаб машғулотлар кунига икки маҳалдан олиб борилмоқда. Эрталабки машғулот соат 10:00дан 12:00гача бўлди. Кечки машғулот эса соат 15:00-17:00 оралиғида ўтди.
Машғулотлар Шўрбулоқ даҳасидаги сунъий қопламали майдонда олиб бориляпти. Биринчи кунданоқ Эдгар Гесс машғулотларни жиддий суръатда олиб борилаётганини айтиб ўтиш жоиз. Футболчиларда юз бераётган чарчоқ аломатлари ҳам машғулотлар қаттиқ ўтаётганидан даракдир.

Бугунги машғулотлардан кейин ҳужумчи Акмал Жўрабоевга жавоб берилди. Фарруҳ Турдиалиев, Санжар Асақаралиев, Шукур Жумабоев, Абдумалик Абдуллаев, Иқбол Акрамов, Тимур Яфаров, Азиз Алижонов, Шавкат Раимқулов каби футболчилар машғулотларда қатнашишаётганини хабар қилгандик. Таркибга шу кунларда яна янги ўйинчиларни келиб қўшилиши кутилмоқда.