10 январь куни терма жамоамизга рақиблик қиладиган Шимолий Корея терма жамоаси турнир олдидан ОАВларга Осиё Кубогидаги мақсадларини баён этди. Жанубий Кореянинг «Munhwa Ilbo» нашри хабарига кўра, Шимолий Корея футбол ассоцияцияси хорижий алоқалар бўлими бошлиғи Ри Канг Хонг интервью бераркан, жумладан, шундай деди:

«Одатда, япон футболчилари футболдан мароқланишини айтишади. Мен буни ҳеч тушиб мағзига етолмайман. Биз учун эса футболдан роҳат олиш бошқача маънони англатади. Халқимиз билдирган ишончни оқлаб, бутун Шимолий Корея халқига қувонч улашиш. Мана, биз роҳатланадиган нарса! Оддий футбол мухлиси футболдан мароқланиши мумкин. Аммо терма жамоа футболчисининг фикру хаёли майдондаги жойида бўлиши лозим».

Швейцария чемпионатида тўп сурувчи 23 ёшли Пак Кванг Рёнг таркибдан жой олган бўлса-да, барибир Шимолий Кореяда «Халқ Руниси» дейиладиган Чонг Те Сенинг ўрни бўлак эди. Шимолликлар футбол раҳбари таркибдаги йўқотишларга қарамай, терма жамоанинг иштаҳаси карнайлигини яширмади:

«Гуруҳимизда осон бўлмаган рақиблар бўлса ҳам Олимпиада ва ЖЧга чиқиш ниятида бўлган терма жамоамиз бундай рақибларга дуч келиши яхшиликкадир. Биз Осиё Кубогида кучли тўртликка киришни мўлжаллаяпмиз».

Хориж ОАВларида Шимолий Корея интернет чекланган давлат сифатида эътироф этилса ҳам жаноб Ри гуруҳдаги рақибларини интернет орқали фаол ўрганиб чиққанликларини таъкидлади:

«Биз интернет орқали рақиблар ҳақида маълумотларга эга бўлдик. Мамлакатимизда интернетга ҳеч қандай чеклов йўқ. Хорижда жойлашган Шимолий Корея элчихоналари эса рақибларимизнинг ўйинлари ёзилган видеоларни бизга етказиб беришди».

Шунингдек, жаноб Ри Шимолий Кореянинг Австралиядаги илк ёпиқ машғулотларини кузатишга келган Жанубий Корея ва маҳаллий ОАВ вакилларига қарата:

«Расмий интервьюларга ҳали етарлича вақт бўлади. Ҳаммасига улгурасизлар», дея гапни қисқа қилди.

Отабек Йўлдошев
Жанубий Корея, Сеул