Жанубий Корея босма ва интернет нашрларидаги Осиё Кубогига оид чиқишларга назар ташласангиз, жанубликлар ҳали турнир бошланмай туриб ўзларини чорак финалда рақибини кутаётгандек тутаётганлигига гувоҳ бўласиз. Деярли барча нашрлар чорак финалда Жанубий Кореяга ким рақиблик қилишию рақибнинг заиф томонларини муҳокама қилиш билан овора.
Жумладан, бугун «Herald Sports» нашри эълон қилган мақола ҳам «B» гуруҳидаги тўрт жамоани қатор турғазиб қўйиб, ичидан зўрини танламоқчи бўлган қаҳрамон номидан ёзилгандек тасаввур уйғотади.
«Бизга чорак финалда дуч келиши мумкин бўлган жамоа Ўзбекистондир. Йилдан йилга кучайиб бораётган ушбу жамоа Осиё Кубогидаги натижаларини тобора яхшилаб боряпти. Ўзбекларнинг Япония ва Саудия Арабистони каби жамоалардан саккизталаб гол ўтказиб юборадиган даврлари энди ўтмишда қолди. Жамоани ҳозирда «Ўзбек афсонаси» Миржалол Қосимов бошқаради. Унинг қўл остида Сервер Жепаров, Одил Аҳмедов, Азизбек Ҳайдаров, Тимур Кападзе, Санжар Турсунов каби калит футболчилар мавжуд. Ушбу футболчилар ўйинни ақл билан назорат қила оладилар. Аммо Ўзбекистоннинг хужум чизиғида яққол голеадор йўқ. Максим Шатских аллақачон терма жамоа билан хайрлашган, «Сувон»да ўйнаб кетган Александр Гейнрих эса таркибда йўқ. Жамоада Игор Сергеев ёки Баҳодир Насимов «Шацких вазифаси»ни бажариши лозим бўлади», деб ёзади корейс нашри.
«Ўзбекистоннинг бел қисми бақувват ! Бош қисми-чи? Билмасам...» дея сарлавҳа қўйган нашр бел қисми деб ярим ҳимоя чизиғимизни, бош қисми дея ҳужум чизиғимизни енгил юмор қилган бўлса, ажабмас. «B» гуруҳидаги Саудия Арабистони ҳақида ёзаркан корейс нашри:
«Бир вақтлар Осиёни титратган кучли Саудия Арабистони қаёққа кетган? Нима бўлганда ҳам Саудия Арабистони ўзининг обрўсини тиклаш учун ҳаракат қилса керак», дея пичинг қилади. Шунингдек, нашр арабларга бош мураббийлик қилаётган руминиялик Козмин Олариуни 1997 йилдан 2000йилгача кей-лигадаги «Сувон» клубида тўп сурганлигини, корейс футболи «ҳавосидан нафас олганлиги»ни қистириб ўтади.
Деярли барча корейс нашрлари «B» гуруҳидан Ўзбекистон ва Саудия Арабистони терма жамоалари чорак финалга йўл олишларини тахмин қилмоқда. Корейс ОАВлари «Европага яқин услубда тўп сурадиган Ўзбекистон ва «кўрпа-тўшак қилиб ётиб оладиган» арабча футбол»га қарши чора излаб туришни маслаҳат бермоқда.
Отабек Йўлдошев
Жанубий Корея, Сеул
