Хитой ва Ўзбекистон терма жамоалари ўйинидан олдинги матбуот анжуманида Ўзбекистон терма жамоаси ярим ҳимоячиси Одил Аҳмедов ҳам иштирок этди. Терма жамоа етакчиларидан бири Хитойга қарши ўйинда жамоа ҳамжиҳатликда ўйнаб, рақибни мағлуб этишни мақсад қилганини айтиб ўтди.

«Терма жамоа мураббийининг фикрига қўшиламан. Хитой анча кучли жамоа экани аниқ. Биз эртага уларга қарши ҳамжиҳатлик билан ўйнаб уларни мағлуб этмоқчимиз. Бунга кучимиз етади», - дейди Аҳмедов.

«Дастлабки вазифа - гуруҳдан чиқиш. Гуруҳдан чиқиб олгач эса кимга қарши ўйнашнинг аҳамияти йўқ. Австралияга қарши тушиб қолсак, уларга қарши ҳам ўйнашга тайёрмиз», - дея қўшимча қилди терма жамоа ярим ҳимоячиси.

Одил Аҳмедов шунингдек, Қатардаги Осиё Чемпионатида Хитой дарвозасига киритган голи ҳақида тўхталиб ўтди ва хозирги Хитой термасини аввали Осиё Кубогидаги терма жамоа билан таққослай олмаслигини таъкидлади.

«Хитойга урган голим ёдимда. Аммо, ҳозирги Хитой билан аввалгисини таққослай олмайман, боиси уларни деярли кузатиб бормайман. Аммо, ҳозир барча терма жамоалар ўсишда давом этмоқдалар ва Хитой ҳам ҳозир аввалгисидан кўра кучлироқ экани аниқ».

«Биринчи ўйин доимо қийин кечади, аммо мен ҳозир анча яхши ҳолатдаман. Эртанги ўйинда бор кучим билан ўйнашга ҳаракат қиламан», - дейди Аҳмедов.