Хитой терма жамоаси бош мураббийи Ален Перрен ўйиндан олдинги матбуот анжуманида Ўзбекистонга қарши ўйинда унинг жамоаси ғалаба қозонишга ҳаракат қилишини таъкидлади.
"Турнирни яхши бошладик. Рақиб илк ўйинда КХДРдан кучли эканини исботлади. Ўзбекистон аввалги Осиё Кубогида кучли тўртликка кира олган ва уларнинг сафида анча кучли ўйинчилар бор. Айниқса 8 (Сервер Жепаров) ва 18 (Тимур Кападзе) - рақамдаги футблчиларини алоҳида таъкидлаган бўлар эдим. Аввалги Осиё Кубогида улар билан 2:2 ҳисобида дуранг ўйнаган эдик, бу сафар ғалаба қозонишга ҳаракат қиламиз", - дейди Хитой терма жамоаси бош мураббийи.
"Бизнинг Ўзбекистонга қарши ўйин учун ўз режамиз бор. Албатта биз Саудия Арабистони ва КХДР терма жамоалари ўртасидаги ўйин натижасини билган ҳолда майдонга тушамиз, аммо бор диққатимизни ўз ўйинимизга қаратамиз. Гуруҳ босқичи уч ўйиндан иборат. Уларнинг барчасида ғалаба қозона олсак, албатта чорак финалга чиқамиз", - дейди Перрен.
