Таиландда ўтказилган “Осиё соҳил ўйинлари”да эркаклар ўртасида 81 килограмм вазн бўйича олтин медални қўлга киритган Санжар Тўхташев допинг назоратидан ўта олмади.
Халқаро антидопинг агентлигининг халқаро кураш федерациясига берган маълумотига кўра, ўзбекистонлик курашчининг қонида тақиқланган препарат моддаси борлиги аниқланган. Бу ҳақида, халқаро кураш федерациясига асосланиб, Sports.uz нашри хабар бермоқда.
Федерация Тўхташевни икки йилга дисквалификация ва шу вақтгача қўлга киритган натижаларидан ҳам маҳрум қилиш ҳақида қарор чиқарган. Ундан олтин медаль ҳам олиб қўйилди.
Ушбу олтин медални қайси спортчига бериш борасида якуний қарор Осиё Олимпия қўмитаси ва Осиё соҳил ўйинлари ташкилотчилари ўртасидаги келишувдан сўнг маълум қилинади.
