Эртага Осиё Кубогининг 2-тур учрашувлари давом эттирилади. Гуруҳдошларимиз Саудия Арабистони ва КХДР терма жамоалари ўзаро ҳисоб-китоб қилишади. Бугун одатга кўра, иккала терма жамоа бош мураббийлари ОАВ ходимларининг саволларига жавоб қайтарди. Қуйида КХДР бош мураббийи Чо Тонг Собнинг фикрлари билан танишишингиз мумкин.

- Биринчи учрашув биз учун омадли келмади, шу боис қолган икки ўйинда максимал натижага ҳаракат қиламиз. Саудия Арабистони жиддий рақиб, агар ижобий натижага эришишни истасак астойдил шуғулланимиз керак. Биз ўз ўйинимизни намойиш қила олсак, хоҳлаганимизга эриша оламиз.

Мен оптимистман. Шогирдларимга ишонаман. Улар билан кўп меҳнат қилдик. Ўзбекистондан қабул қилиб олинган мағлубиятнинг сабаби шуки, биз 90 дақиқа давомида диққатни ушлаб тура олмадик.

Эртанги ўйин олдидан муаммоларимиз йўқ. Барча футболчилар учрашувга тайёр ҳолатда турибдилар. Ҳозирча асосий таркибни аниқлаганим йўқ. Бунга сўнгги машғулотлардан сўнг ойдинлик киритаман.

Саудия Арабистони билан Хитой ўртасидаги беллашувни кўриб, ўзимга етарлича хулосалар чиқариб олдим. Араблар ҳужумкор ўйин кўрсатишди. Шунчаки, пенальтидан фойдалана олишмаганидан сўнг ўзларига ўхшамай қолишди.