Корейс ОАВлари хабарларига қараганда, бугун Жанубий Корея терма жамоаси чорак финал ўйини ўтказиладиган Мельбурн шаҳрига етиб келди. Жамоа бош мураббийи Ули Штилике чарчоқларни ёзиш мақсадида бугунга машғулотлар ўтказмади. Жамоа бугун кунбўйи дам олди.
Корейслар 17 январь куни Австралия билан ўйинда қаттиқ чарчашганлиги туфайли бугун Мельбурнга етиб келибоқ дам олиш берилган. Парк Жу Хо (Майнц-05", Германия)нинг жароҳати енгил. Унинг клубдоши Ку Жа Чол ва Англиянинг "Болтон" клуби ярим ҳимоячиси Ли Чунг Йонг жароҳатлари жиддийлиги сабаб аллақачон Австралияни тарк этишган. Ярим ҳимоячи Сон Хеунг Мин ("Байер Леверкузен", Германия) ва асосий дарвозабон Ким Жин Хён ("Серезо Осака", Япония) эса шамоллаб қолганлиги туфайли Кувайтга қарши ўйинни ўтказиб юборишганди. Улар аста-секин тикланмоқда.
Корейслар асосий машғулотларга эртага киришишади. 21 январь куни эса енгил машқлар ўтказилиб, Ўзбекистонга қарши майдонга тушадиган таркиб аниқланади.
Отабек Йўлдошев
Жанубий Корея, Сеул
