Anhor.uz интернет-нашри Австралияда футбол бўйича Осиё Кубоги-2015 мусобақалари ўтказилаётгани муносабати билан, Тошкент шаҳрида 20-27 ёш оралиғидаги 100 нафар қиз ўртасида “Футбол мухлисаларини излаб” сўровномасини ўтказди.

Респондентлар учта – “Австралияда бўлаётган мусобақа ҳақида биласизми?”, “Ўзбекистонлик футболчиларни танийсизми?” ва “Улар орасида кумирингиз борми?” саволлари берилган.

Сўровнома натижаларига кўра, респондентларнинг 51 фоизи Австралиядаги мусобақа ҳақида билади, 2 фоизи эса умуман футболга қизиқмаслигини билдирган.

Сўровномада иштирок этган қизларнинг 57 нафари Одил Аҳмедовни, 45 нафари Сервер Жепаровни, 37 нафари Игорь Сергеевни, 33 нафари Жамшид Искандеровни, 29 нафари Темур Кападзени, 22 нафари эса Санжар Турсуновни билишини айтган.

“Футбол ҳаками Равшан Эрматов ва терма жамоа бош мураббийи Миржалол Қосимов қизларнинг мутлақ кумири бўлиб чиқди. Қайд этиш жоиз, “Ўзбекистонлик футболчиларни биласизми?” саволига уч нафар қиз португалиялик Криштиану Роналду, деб жавоб беришди”, – дейилади хабарда.