Америкалик ўта оғир вазнда иштирок этувчи боксчи Брайант Женнингс Владимир Кличко билан жанг ўтказиш ҳақида шартнома имзолади. Бу ҳақда “Boxingscene” порталида хабар қилинмоқда.

“Беллашув бўлиб ўтади. Бунинг учун ҳамма нарса қилинди”, – дейди ушбу боксчи. Жанг 25 апрелда бўлиб ўтиши белгиланган.

У ушбу жанг “Бруклин Нетс” баскетбол клубининг уй майдони ҳисобланадиган Нью-Йоркдаги “Барклайс-центр” спорт мажмуасида бўлиб ўтишини маълум қилди.

Бу жанг шартномаси имзоланиши бир неча маротаба молиявий келишмовчиликлар ҳамда америкалик боксчига эгалик қилувчи промоутерлик компаниясининг эгаси ўзгаргани сабабли орқага сурилаётган эди. Бу промоутерлик компанияси 2014 йилнинг декабрь ойида машҳур реп қўшиқчиси Jay-Z’га сотиб юборилган эди. Шу туфайли музокараларни бошқатдан бошлашга тўғри келган.

Ўзининг боксёрлик фаолиятида бу 30 ёшли боксчи 19 жанг ўтказиб, бирортасида ҳам мағлубиятга учрамаган.

Кличконинг ҳисобида эса, 66та жанг бўлиб, ундан 63тасида ғалаба қозониб (53 таси нокаут билан), 3 тасини мағлубият билан якунлаган.