Ўзбекистон терма жамоаси бош мураббийи Миржалол Қосимов Саудияга қарши ўйин учун бошланғич таркиб борасида қачон бир қарорга келганини "Интерфутбол"га берган интервьюси чоғида айтиб ўтди.
— Миржалол ака, айтингчи, бугунги бошланғич таркибни қачон ва қай ҳолатда танладингиз?
— Тўғрисини айтсам, ўша биз учун аламли тугаган Хитой билан ўйиндан кейиноқ таркиб бўйича аниқ тўхтамга келгандим.
— Нимагадир иккинчи ва учинчи алмаштиришда, футболчи танлашда қарорингизни бир неча марта ўзгартирдингиз...
— Аввало, ўйин кечишини ҳисобга олиб, Воҳид Шодиевни туширдик. Бироздан кейин Одил Аҳмедовга нисбатан ишлатилган кетма-кет қўполликлар ва унинг оёғидаги оғриқдан хавотирланиб, Лутфулла Тўраевни туширмоқчи бўлдик. Хайриятки, ҳаммаси жойида экан. Кейин эса, бироз жисмоний толиқиш ҳис қилган Шуҳратни захирага олишга қарор қилдим. Учинчи алмаштириш эса — вақт тақозоси. Ўйлайманки, бу борада «нуқта»ни тўғри топдик.
— Айтингчи, ҳисоб 1:1 бўлиб қолгач, ичингиздан қандай кечинмалар ўтди?
— Тан оламан, бироз хавотирландим. Аммо ғалаба қозонишимизга ишонгандим, футболчиларимизнинг хатти-ҳаракатлари бу фикрни ишонч билан айтишимга асос. Улар майдоннинг ҳар бир қаричида тўла куч билан ўйнашди. Жумладан, захирадан тушган Воҳид Шодиев ҳам ишончимизни оқлади.
Ушбу экслюзив суҳбатнинг тўлиқ ҳолда "ИнтерФУТБОЛ"нинг 20 январь кунги сешанба сонида ўқишингиз мумкин.
Аҳадхон Абдуҳамитов, Мельбурн шаҳридан
