Бугун "Спорт" канали орқали эфирга узатилган "Футбол шарҳи" кўрсатуви меҳмони бўлган Ўзбекистон терма жамоаси бош мураббийи Миржалол Қосимов жамоанинг ўйини ва натижасидан ЎФФ раҳбарияти қониқиш ҳосил қилганини таъкидлади.

"Бугун эрталаб Ўзбекистон футбол федерациясини президенти Мираброр Усмонов терма жамоа футболчилари ва мураббийлар штаби билан учрашди. Мираброр Зуфарович учрашув чоғида футболчиларга Осиё кубогидаги ўйинлари учун миннатдорчилик билдирди ва терма жамоа қайд этган натижани қониқарли деб топди. ЎФФ раҳбари футболчиларнинг кейинги фаолиятига омадлар тилади. Ўйлайманки, Хитой қарши ўйин ва якуний натижани инобатга олмаганда, мухлисларимиз терма жамоа ўйинларидан мамнун бўлишди", — тилади дейди Миржалол Қосимов.

Терма жамоа бош мураббийи чорак финалда Жанубий Кореяга қарши ўйинда Сервер Жепаровни нима учун майдонга туширмаганини қуйидагича изоҳлади.

"Кореяга қарши ўйинда Одил Аҳмедовнинг жароҳат олиши режамизни ўзгартиришга мажбур қилди. Кореяликларга қарши ўйинда мустаҳкам ва зич ҳимоя асосида ўйнаётганимиз учун Одилнинг ўрнига Кападзени туширишга қарор қилдим. Ўйин охирида эса Лутфулла Тўраевнинг ўрнига Жепаров ёки Искандаровни тушириш керак бўлганида, мени Жамшидни танладим. Боиси, унда Худо томонидан берилган нозик пас бериш қобилияти бор. Қолаверса, Искандаров ва Рашидов бир-бирларини яхши тушунишади, улар яхши тандем ҳосил қилишади. Шу боис, Серверни эмас, Жамшидни майдонга туширдим", - дейди Ўзбекистон терма жамоаси бош мураббийи.