"Реал Мадрид" қийин ўтиши кутилган ҳафтанинг илк ўйинида йирик ҳисобда ғалаба қозонди. Анчелотти шогирдлари дастлабки даврадаги мағлубият учун "Реал Сосьедад"дан қасос олишди.

Учрашув эса мутлақо кутилмаган ҳолат билан бошланди. Меҳмонлар бурчак тўпи ишлашди ва ўйиннинг 40-сониясидаёқ ҳисобни очишди. Роналдусиз ўйнашга мажбур бўлаётган мадридликлар орада 2 дақиқа ўтиб Хамеснинг бош билан урган голи эвазига ҳисобни тенглаштиришди.

Орадан бир дақиқа ўтиб, "Сосьедад" яна ҳисобда олдинга чиқиб олишига бир баҳя қолди. Жарима майдончаси ташқарисидан йўлланган зарбани Серхио Каналес яқин масофадан дарвоза томон бурди. Тўп эса шундоққина устун ёнидан ўтиб кетди. Айтиш мумкинки, бу Девид Мойес шогирдларининг ўйинда энг сўнгги хавфли ҳужумлари эди.

"Реал" ўйинни тўла назорат қилди ва учрашувнинг қолган дақиқаларида 3та гол уришга муваффақ бўлди. Бензема 2та ва Рамос томонидан урилган голлар "Мадрид" йирик ҳисобдаги ғалабани тақдим этди. Бундан ташқари, Гарет Бэйл 2 марта ўта қулай вазиятлардан дарвозани ишғол қила олмади.

"Реал" ўз очколарини 51тага етказиб олди ва пешқадамлик қилишда давом этади. Жамоа ҳафта ўртасида "Севилья"га қарши қолдирилган, ҳафта сўнгида эса "Атлетико"га қарши 22-тур ўйинида майдонга тушади.

Испания чемпионати, 21-тур
Реал Мадрид – Реал Сосьедад 4:1 (2:1)
Голлар: 0:1 – 1 Элустондо, 1:1 – 3 Хамес, 2:1 – 37 Рамос, 3:1 – 52 Бензема, 4:1 – 76 Бензема.
Реал Мадрид – Касильяс, Рамос, Карвахаль, Варан, Марсело, Иско, Хамес (Хесе, 74), Бэйл, Ильярраменди, Кроос (Хедира, 81), Бензема (Эрнандес, 81).
Реал Сосьедад – Рульи, Элустондо (Бергара, 63), Мартинес, Гонсалес, Берчиче, Гранеро, Пардо, Каналес (де ла Белья, 46), Элустондо, Прието, Вела (Агиррече, 17).
Огоҳлантиришлар: Ильярраменди (31), Марсело (70), Хедира (88), Берчиче (88).