Футбол бўйича Ўзбекистон миллий терма жамоаси Таиландда ўтказилаётган, олимпия терма жамоалари ўртасидаги Қирол кубоги баҳсларини мағлубият билан бошлади.
Жанубий Кореяга қарши кечган ўйинда Шуҳрат Мақсудов қўл остидаги Ўзбекистон олимпия терма жамоаси 0:1 ҳисобида мағлуб бўлди. Ўйин тақдирини ҳал қилган ягона гол 23-дақиқада киритилди.
Қайд этишларича, Ўзбекистон терма жамоаси футболчилари ўйинда анча қўпол ҳаракат қилишган. Хусусан, учрашувнинг сўнгги дақиқаларида дастлаб ярим ҳимоячи Жалолиддин Машарипов, сўнг ҳимоячи Тоҳир Шамшитдинов майдондан четлатилган.
YouTube’да ўзбекистонлик ушбу футболчиларнинг қўпол ҳаракатлари тасвирланган видеолар ҳам пайдо бўлган. Хусусан, унда Тоҳир Шамшитдинов муштлари билан худди боксчилардек ҳужум қилиб, рақибини қарийб нокдаун ҳолатига туширганини кўриш мумкин.
