Жанубий Корея олимпия терма жамоаси мураббийи вазифасини бажарувчи Чо Жонг Хо корейс ОАВларига ўз фикрларини билдириб ўтди.

Таиландга етиб келишгач, бош мураббий Ли Кванг Жонг соғлиғи билан боғлиқ муаммолар туфайли Кореяга қайтиб кетди. Шундай қилиб турнирда Чо Жонг Хо мураббий вазифасини бажарадиган бўлди.

"Ўзбек футболчисининг ҳаракати барча чегарадан ўтиб тушди", - дея гап бошлади Чо Жонг Хо. "Аслида бундай вазият учун бутун Ўзбекистон терма жамоасини жазолаш лозим. Бу вазиятда шогирдим Шим Санг Мин босиқлик билан ўзини тутиб қолганлигидан хурсандман. Бундай ҳолатларда 10 нафар футболчидан 10 нафари муштга мушт билан жавоб қайтаради. Санг Миндан жуда хурсандман. Агар у ҳам жавоб зарбаси берганида ўзбек футболчисидан фарқи қолмасди. У корейс футболининг ор-номусини сақлаб қолди. Бу можаро футбол учун жуда катта дарс вазифасини бажарса ажабмас. Шим Санг Мин ҳали ёш. Келажаги олдинда. Энди у бундай вазиятдан хулоса чиқарди ва келажакда ҳам шунга ўхшаш ҳолатда жим туриш маъқуллигини англаб етса бас", - дейди кореялик мутахассис

Отабек Йўлдошев
Жанубий Корея, Сеул