Туркиянинг Анталия шаҳрида олимпиада ўйинлари дастуридан ўрин эгаллаган Таэквондо (WTF) бўйича 2016 йилги XXXI ёзги Олимпиада ўйинларининг йўлланмалари учун рейтинг очколар ўйналадиган Туркия очиқ чемпионати баҳслари ўтказилмоқда.    Эътиборлиси, ўта кучли рақобат остида ўтаётган мазкур нуфузли мусобақада икки нафар ҳамюртимиз, XVII ёзги Осиё ўйинлари ғолиби Жасур Бойқўзиев ва XVII ёзги Осиё ўйинлари совриндори Дмитрий Шокин барча рақиблари устидан ғалаба қозониб, олтин медалларга сазовор бўлдилар. Ушбу муваффақиятдан сўнг ҳар икки спортчимиз ҳам рейтинг очколарини янада яхшилаб олдилар.    Туркия очиқ чемпионатида, шунингдек, ўсмирлар ва ўспиринлар (кадетлар) ўртасида ҳам мусобақалар ўтказилмоқда. Ўсмирлар терма жамоамиз таркибидан 12 нафар умидли спортчимиз ўрин эгаллаган бўлса, ўспиринлар ўртасида бўлиб ўтадиган баҳсларда тўрт нафар ҳамюртимиз Ватанимиз шарафини ҳимоя қилади.    Туркия очиқ чемпионати баҳслари бугун ниҳоясига етади. Ўзбекистонлик спортчилар 17 февраль куни соат 7:30да Ватанимизга қайтиб келадилар.    Эслатиб ўтамиз, 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмаларини қўлга киритиш учун Таэквондо (WTF) спорт тури вакиллари рейтинг очколари ўйналадиган қатор йирик мусобақаларда иштирок этадилар. 2015 йил якунида ушбу мусобақаларда қўлга киритилган рейтинг очколар жамланади ва ҳар бир вазн тоифасида 1-6 ўринларга сазовор бўлган спортчилар Олимпиада ўйинларида қатнашиш хуқуқига эга бўладилар. Бундан ташқари Осиё давлатлари вакиллари учун 2016 йилнинг январь – февраль ойларида қитъавий саралаш мусобақаси ўтказилади. Мазкур турнирда 1-2 ўринларни банд этган таэквондо усталари ҳам Олимпиада ўйинларига йўлланма оладилар. Бугунги кунга келиб, ҳамюртларимиз орасида энг юқори рейтинг кўрсаткичга 2014 йили Жанубий Кореянинг Инчеон шаҳрида ўтказилган Осиё ўйинлари ғолиби Жасур Бойқўзиев эга. Жасур ўз вазн тоифасида рейтинг жадвалида кучли учликда бормоқда.