Ўзбекистонлик ҳужумчи Александр Гейнрих фаолиятини Қозоғистон чемпионатида давом эттирадиган бўлди. У Чимкент шаҳрининг "Ордабаси" клуби аъзосига айланди.

— "Локомотив" клуби билан йиғинда иштирок этаётгандим, бироқ клуб раҳбарияти билан тушунмовчилик юзага келди ва икки томоннинг келишувига кўра шартномани бекор қилдик. Тошкентда мустақил равишда формамни ушлаб туришга ҳаракат қилдим. Бу пайтда Чимкентдан таклиф тушди ва мен бу таклифни бажонудил қабул қилдим. Шунингдек, "Ордабаси"нинг Европа лигасида иштирок этиши мен учун қўшимча рағбат. Еврокубокларда жамоа билан биргаликда муносиб қатнашишни истайман.

— ОАВда пайдо бўлган маълумотларга қараганда, сиз "Иртиш" билан ҳам шартнома имзолашга яқин эдингиз.
— "Локомотив"нинг йиғинида иштирок этаётганимда "Иртиш" вакиллари менга мурожаат қилишди, аммо улардан аниқ таклиф тушмади.

— Виктор Кумиков билан яхши танишмисиз?
— Шахсан ўзим таниш эмасман, аммо унинг ўзи ва иш услуби ҳақида кўп эшитганман. У Ўзбекистонда ҳам ишлаган. У қаттиққўл ва талабчан мутахассис эканини яхши биламан.

— "Ордабаси" ўйинчиларини танийсизми?
— Кўпчилиги билан яхши танишман. Айримлари билан дўстлашганмиз, айниқса, Андрей Сидельников билан оилавий борди-келдимиз бор. У менинг энг яхши дўстим. Бу ҳолат ҳам "Ордабаси" таклифини қабул қилиш учун яна бир сабаб. Биринчи навбатда жамоа ўзи иштирок этаётган барча мусобақаларда иштирок этишини истайман ва бунинг учун бор кучимни бериб ўйнайман.