ФИФА президенти Йозеф Блаттер ирқчиликка қарши кураш ташкилотининг ҳисоботида россиялик мухлисларнинг ирқий камситиш билан боғлиқ 200та ҳолат борасида гапириб ўтди.
“Ҳисоботдан хабарим бор. Бу ҳолат хавотирга солиши аниқ. Биз бу борада уларга катта бир ўқитиш дастури ишлаб чиққанмиз. Агар бу вазият тўхтамайдиган бўлса, Россияга нисбатан бир қатор санкциялар қўллашимизга тўғри келади”, дея Блаттернинг сўзларидан иқтибос келтиради “Корреспондент” нашри.
Берилган ҳисоботга кўра, Россияда шу бўйича 200та ҳолат сўнгги икки мавсумда қайд этилганини кўрсатади. Буларнинг ичида 72та ҳолатда миллатчилик рамзлари, яна 22 ҳолатда эса кавказ миллатига мансуб фуқароларга нисбатан қилинган ножўя ҳаракатлар ўрин олган.
Шунингдек ташкилот 2018 йилда Россияда бўлиб ўтадиган жаҳон чемпионати вақтида меҳмонларнинг хавфсизлигини таъминлаш ҳам осон бўлмаслигини қайд қилган. Улар Россияга махсус чора-тадбирлар ишлаб чиқиш таклифини киритган. Бундай чора-тадбирларга ирқий камситилиш ҳолатлари бўйича жиддий жазолар қўллаш, ҳуқуқлари поймол бўладиган гуруҳларнинг қўллаб қувватлаш бўйича умуммиллий ишларни амалга ошириш режаси киритилган.
Аввалроқ, ФИФА ирқчилик сабаб Россияда бўлиб ўтадиган жаҳон чемпионатига бойкот эълон қилинишидан хавфсираётганини маълум қилганди.
