6-8 март кунлари Греция пойтахти Афина шаҳрида бадиий гимнастика бўйича “Афродита Кубоги” бўлиб ўтди. Ўз тарихида илк бор ташкил этилган халқаро турнирда Ўзбекистон терма жамоаси умумжамоа ҳисобида биринчи ўринни эгаллади.
Халқаро турнирда 18 давлат – Греция, Ўзбекистон Болгария, Исроил, Швеция, Швейцария, Германия, Буюк Британия, Словения, Босния ва Герцеговина, Эстония, Қозоғистон, Малайзия, Австралия, Австрия, Голландия, Кипр ҳамда Туркиядан бадиий гимнастикачилар иштирок этишди.
Таркибида 8 нафар спортчимиз бўлган терма жамоамиз жами 11 та (5 та олтин, 4 та кумуш, 2 та бронза) медаллар жамланмасини қўлга киритишди. Шахсий баҳсларда Анора Давлатова (лентада машқ) ва Равиля Фархутдинова (халқа) шохсупанинг энг юқори поғонасига кўтарилишди. Шунингдек, қизларимиз жамоавий баҳсларда яна 3 та олтин медалга эгалик қилишди.
