O‘zbekiston ayollar terma jamoasi 10-19 yanvar kunlari Olmaliq shahrida navbatdagi o‘quv-yig‘in mashg‘ulotlarini o‘tkazadi, deya xabar beradi "Sevinch" jamoasi rasmiy sayti.
Xabaringiz bor, shu yili ayollar terma jamoalari o‘rtasida Osiyo chempionatining saralash uchrashuvlari bo‘lib o‘tadi. Ana uchrashuvlarga tayyorgarlik ko‘rish maqsadida mamlakatimiz ayollar terma jamoasi ushbu yig‘inni tashkil etmoqda.
Ushbu yig‘inga har doimgidek ko‘plab futbolchi qizlarimiz taklif etilgan. Bular Laylo Tilavova, Maftuna Jonimqulova, Kamola Risqiyeva, Maftuna Shoyimova, Zumrat Nazarova, Malika Burxanova, Sevara Normurodova, Nilufar Qudratova va Mahliyo Sarikovalardir.
“Sevinch” PFK murabbiylari Bahrom Norsafarov va Yelena Belovalar terma jamoa murabbiylar shtabiga yordam berishadi. Eslatib o‘tamiz, Bahrom Norsafarov va Yelena Belovalar mamlakatimizning 16 va 19 yoshli terma jamoalarining asosiy murabbiylari hisoblanishadi. Shuningdek mazkur terma jamoalarning asosini ham “Sevinch” jamoasining futbol qizlari tashkil etishadi.
