"Chelsi" hujumchisi Diyego Kostaning jamoadoshlari uning bosh murabbiy Antonio Konte bilan ziddiyatli voqeasidan so‘ng gaplashib oldilar.

Futbolchilar 28 yoshli hujumchiga o‘z hulqi uchun bosh murabbiydan kechirim so‘rashni va Xitoy taklifiga rad javob berishni maslahat berdilar.

Futbolchilarning fikriga ko‘ra, Kosta hozir bor e’tiborini "Chelsi"ning chempionlik uchun kurashiga qaratib, shundan so‘ng yozda ketishi kerak.

Diyego Kosta juma kuni kechda o‘zining instagramdagi sahifasiga "Olg‘a, "Chelsi" deb yozgan. Uning bu fikrini Jon Terri va Fransesk Fabregas qo‘llab quvvatlagan. Aynan shu o‘yinchilar Kostaning "aqlini kiritish"da ko‘proq harakat qilgan edilar.

Avvalroq, Kosta Xitoydan 30 millionlik taklifni eshitib, londonliklarning mashg‘ulotlariga uch kun kelmagani xabar qilingan edi.

21-turda "Lester"ga qarshi o‘yin oldidan Kosta jamoa murabbiylari bilan bahslashib qolgan. Konte o‘z yordamchilari tarfida bo‘lgan va futbolchiga "Xitoyga jo‘na!" deb baqirgan. Futbolchi navbatdagi o‘yin ro‘yxatiga kiritilmadi.

Klub xo‘jayini Roman Abramovich shartnomasi yana ikki yarim yil amalda bo‘ladigan futbolchini sotishni istamayapti.