"Челси" ҳужумчиси Диего Костанинг жамоадошлари унинг бош мураббий Антонио Конте билан зиддиятли воқеасидан сўнг гаплашиб олдилар.
Футболчилар 28 ёшли ҳужумчига ўз ҳулқи учун бош мураббийдан кечирим сўрашни ва Хитой таклифига рад жавоб беришни маслаҳат бердилар.
Футболчиларнинг фикрига кўра, Коста ҳозир бор эътиборини "Челси"нинг чемпионлик учун курашига қаратиб, шундан сўнг ёзда кетиши керак.
Диего Коста жума куни кечда ўзининг инстаграмдаги саҳифасига "Олға, "Челси" деб ёзган. Унинг бу фикрини Жон Терри ва Франсеск Фабрегас қўллаб қувватлаган. Айнан шу ўйинчилар Костанинг "ақлини киритиш"да кўпроқ ҳаракат қилган эдилар.
Аввалроқ, Коста Хитойдан 30 миллионлик таклифни эшитиб, лондонликларнинг машғулотларига уч кун келмагани хабар қилинган эди.
21-турда "Лестер"га қарши ўйин олдидан Коста жамоа мураббийлари билан баҳслашиб қолган. Конте ўз ёрдамчилари тарфида бўлган ва футболчига "Хитойга жўна!" деб бақирган. Футболчи навбатдаги ўйин рўйхатига киритилмади.
Клуб хўжайини Роман Абрамович шартномаси яна икки ярим йил амалда бўладиган футболчини сотишни истамаяпти.
