Amerikalik sobiq bokschi Floyd Meyvezer UFC chempioni Konor Makgregordan boshqa hech kimga qarshi ringga ko‘tarilmasligini aytdi. 39 yoshli sportchining so‘zlarini Boxingscene keltirdi.
«Agar jang Konor Makgregorga qarshi bo‘lsa, men uchun bu ahamiyat kasb etadi. Boshqa raqib bilan jang qilishning ma’nosi yo‘q. Men biznesmenman. Odamlar ko‘ngilxushlikni istaydi. Jangni tashkil qila olsak, katta mablag‘ ishlab olamiz», – dedi Meyvezer.
14 yanvar kuni Mutlaq jangchilik chempionati (UFC) prezidenti Dana Uayt Meyvezer va Makgregor jangi uchun har ikki sportchiga 25 million dollardan to‘lashga tayyor ekanini ma’lum qilgandi.
Floyd Meyvezer Konor Makgregor o‘rtasida jang bo‘lib o‘tishi mumkinligi haqidagi xabarlar UFC chempioni bokschilik lisenziyasini olganidan keyin paydo bo‘ldi. Irlandiyalik jangchi Meyvezer bilan jang uchun 100 million dollar ishlab olish istagini bildirgandi.
Ma’lumot uchun, 28 yoshli Makgregor faoliyatini 2008 yilda boshlagan. Shu vaqtgacha u 23 ta jang o‘tkazib, 20 tasida (17 tasida nokaut bilan) zafar quchgan va 3 tasida mag‘lubiyatga uchragan.
2015 yili bokschilik faoliyatini tugatgan 39 yoshli Floyd Meyvezer professional ringda 49 ta jang o‘tkazib, barchasida (26 tasida nokaut bilan) g‘alaba qozongan.
