Futzal bo‘yicha O‘zbekiston U-20 terma jamoasi Eron yoshlar termasi bilan o‘rtoqlik uchrashuvi o‘tkazadigan bo‘ldi. Bu haqda mehrnews.com veb-sayti xabar tarqatdi.

Manbaga ko‘ra, o‘rtoqlik o‘yini aprel oyining so‘nggi haftasida Toshkentda o‘tkaziladi. Avvalroq 27–28 yanvar kunlari O‘zbekiston yoshlar terma jamoasi Tojikiston U-20 termasiga qarshi o‘rtoqlik o‘yinlarini o‘tkazishi haqida xabar berib o‘tgandik.

Mazkur o‘rtoqlik uchrashuvlari 2017 yilning 9–21 may kunlari Tailandda, tarixda ilk marotaba o‘tkaziladigan U-20 Osiyo chempionatiga tayyorgarlik ko‘rish maqsadida o‘tkaziladi. O‘zbekiston termasidan tashqari futzal bo‘yicha qit’a birinchiligida Osiyo futbol konfederasiyasi (OFK)ga a’zo 21 mamlakat terma jamoasi ishtirok etadi.

Ma’lumot uchun, futzal bo‘yicha O‘zbekiston U-20 terma jamoasiga ham ispaniyalik mutaxassis Xose Mariya Mendez bosh murabbiylik qilmoqda.