O‘zbekistonning birinchi raketkasi, jahon reytingida 117-pog‘onada borayotgan Denis Istomin «Katta dubulg‘a» turkumidagi Australian Open–2017 turniri ikkinchi davrasida dunyoning 2-raketkasi – serbiyalik Novak Jokovichga qarshi kortga chiqib, qariyb 5 soat davom etgan bellashuvda sensasion g‘alabani qo‘lga kiritdi.

O‘zbekistonlik tennischining mazkur musobaqaning amaldagi chempioni ustidan erishilgan g‘alabasi xalqaro nashrlarning e’tiboriga tushdi. 30 yoshli sportchi bitta g‘alaba bilan Twitter’ning jahon trendiga ham chiqdi.

Denis Istomin musobaqaning uchinchi davrasida ispaniyalik Pablo Karreno Busta bilan nimchorak final yo‘llanmasi uchun kuch sinashadi. 25 yoshli tennischi jahon reytingida 31-o‘rinda qayd etilgan.

Tennischilar faoliyati davomida 2 marta o‘zaro to‘qnash kelgan bo‘lib, har ikki safar Karreno Bustaning qo‘li baland kelgan. Istomin va Busta o‘rtasidagi uchrashuv ertaga, 21 yanvar kuni Toshkent vaqti bilan ertalab 9:30 da start olishi rejalashtirilgan.

Uchinchi davraga yetib kelib, 97 ming dollarni naqd qilgan o‘zbekistonlik tennischi navbatdagi o‘yinda muvaffaqiyatga erishsa, jami 165 ming dollar mukofot puli ishlab oladi.

Denis Istominning Australian Open’da qayd etgan eng yaxshi natijasi 2010 va 2014 yillarga tog‘ri kelgan bo‘lib, har ikki safar o‘zbekistonlik tennischi uchinchi davragacha yetib borgandi. E’tiborlisi, har ikki safar ham u Novak Jokovichga mag‘lub bo‘lgandi.