O‘zbekiston chempioni – “Lokomotiv” yangi mavsum tayyorgarliklari doirasida ilk xorij yig‘inini BAAning Dubay shahrida tashkil etdi. 8 yanvardan boshlangan yig‘in kecha yakuniga yetdi va jamoamiz Toshkentga qaytib keldi.

Ikki hafta davom etgan yig‘in mobaynida “Temiryo‘lchilar” 2 bor sinov-nazorat bahsida maydonga tushishdi. Dastlab Saudiya Arabistonining “Al Qodisiya” klubiga qarshi, so‘ngra Rossiyaning “Zenit” jamoasi bilan ham 0:0 hisobida durang o‘ynaldi.

Shu o‘rinda ta’kidlash joizki, mazkur yig‘in davomida tarkibda bir qator o‘zgarishlar ham yuz berdi. Misol uchun, ilgari jamoamiz sharafini himoya qilgan futbolchilar – Server Jeparov, Temurxo‘ja Abduholiqov va Sanjar Shoahmedovlar boshqa jamoalar safiga yo‘l olishgan bo‘lsa, yig‘inga Kot-d’Ivuarning eng iste’dodli yosh futbolchilaridan biri deya e’tirof etilayotgan Junior Axissan Lendri kelib qo‘shildi.

Shu tariqa jamoamiz a’zolariga qisqa ta’til berildi. Terma jamoa yig‘iniga taklif olgan futbolchilar esa bosh jamoa ixtiyoriga jo‘nab ketishdi. Mashg‘ulotlar endilikda 25 yanvar sanasidan poytaxtimizda davom ettiriladi. Unda Sadriddin Abdullayev hamda jamoamizning yangi a’zosi Murod Bobojonov ham ishtirok etadi.