O‘zbekiston Oliy ligasining to‘rt klubi — «Lokomotiv», «Paxtakor», «Neftchi» va «Nasaf» qishki yig‘inni o‘tkazish uchun Turkiyaning Antaliya shahrini afzal bildi.

«Temiryo‘lchilar» olti kun muqaddam xorijga jo‘nab ketgan bo‘lsa, «Paxtakor» bugun — 5 fevral kuni shuni takrorladi. Oliy liganing 2016 yilgi mavsumini 5-o‘rinda yakunlagan klub 19 fevralga qadar Antaliyada mashg‘ulot olib boradi.

Farg‘onaning «Neftchi» jamoasi ham Toshkent klublarining ortidan ergashdi. Andrey Fyodorov shogirdlari ikki hafta davomida Antaliyadagi yig‘inda ishtirok etadi. «Nasaf» esa Osiyo Chempionlar ligasiga tayyorgarlikni Turkiyada olib bordi.

Avvalroq O‘zbekiston milliy terma jamoasi bosh murabbiyi Samvel Babayan «Lokomotiv» va «Paxtakor» klublariga qulayroq bo‘lsin deb, terma yig‘inini ham Turkiyada bo‘lishini ta’minlagani haqida aytib o‘tgandi. 9—13 fevral kunlari orasida milliy terma jamoa Antaliyada 2 ta o‘rtoqlik o‘yinida maydonga tushadi.

O‘zbekiston klublarining nima sababdan aynan Turkiyani tanlayotgani ochiqlanmagan. Avvalroq Turkiyadagi beqaror vaziyat tufayli Armaniston terma jamoasini yig‘inni Kiprga ko‘chirgan va O‘zbekistonga qarshi o‘rtoqlik o‘yinini bekor qilgandi. Shuningdek, Germaniya Bundesligasi klublari ham Turkiyaga borishdan bosh tortib, Ispaniya, Qatar, BAA, AQSH kabi mamlakatlarda yig‘in o‘tkazishga qaror qilgandi.