40 yoshda ham yevrokuboklarda gollar ursa bo‘ladi. 38 yoshda «Oltin to‘p» sovrini uchun nomzodlar ruyxatiga kirish mumkin. 35 yoshda bitta o‘yinning o‘zida beshta to‘p kiritish hech gap emas. Xullas, shunga o‘xshash misollar bisyor.
Yaqinda Soccer.ru tajribali futbol afsonalaridan iborat ramziy terma jamoa tuzdi. Bu tarkibdan o‘rin olganlarning o‘rtacha yoshi 35dan yuqoriroq. Shu o‘rinda aytib o‘tish kerakki, ulardan atigi bir nafari yevrokuboklarda ishtirok etmaydi. Qolganlar esa bahorgi «pley-off» bahslarida to‘p surishadi. Bu nomlarning deyarli hammasi yil mobaynida qaysidir jabhada o‘zlarini ko‘rsatishga muvaffaq bo‘lishdi. Misol uchun, Aduris o‘tgan mavsum 36ta o‘yinda 35ta gol urdi. Tottining qaytganidan hamma yaxshi xabardor. «Bavariya» asosiy tarkibidagi Riberi esa intilishi orqali ko‘pchilikni lol qoldirdi. Bir necha yillardan buyon o‘ynab kelgan futbolchilar ishqibozlarga xursandchilik ulashishda davom etishmoqda. Bu, albatta, ajoyib holat.
Darvozabon
Janluiji Buffon («Yuventus», 38 yosh)
Bu yoshda hamma darvozabon ham o‘ynashga jazm qilolmaydi. Lekin Buffon nafaqat Italiya chempionati, balki Yevro-2016da ham ishtirok etishga ulgurdi. Hattoki, u bir nechta omadsiz o‘yinlar o‘tkazib, xatolar seriyasiga yo‘l qo‘ygudek bo‘lsa ham, futboldan ketishga botinolmaydi. Bu holatga ishqibozlar ham ko‘nikib qolishgan. «Agar ertaga meni dafn etishsa, hech kim kelmaydi»-deydi Italiya terma jamoasi sardori. Buffon JCH-2018gacha futbolda bo‘ladi va «Yuventus» bilan yana bir bor skudettoni qo‘lga kiritishga urinib ko‘radi. Garchi hozir uni jahonning eng kuchli darvozaboni deb bo‘lmasada, lekin buyuk va afsona ekaniga shak-shubha yo‘q.
Yordamchisi: Iker Kasilyas («Portu», 35 yosh)
Himoyachilar
Dario Srna («Shaxtyor», 34 yosh)
Qanot himoyachilarining jahon darajasida uzoq muddat to‘p surishlari ko‘p kuzatilmaydi, ammo shunday futbolchilar borligi ayni haqiqat. Shundaylardan biri sifatida «Yuventus»dagi Daniel Alvesni ko‘rsatib o‘tish mumkin. To‘g‘ri, u biroz xasisroq, to‘pni o‘z vaqtida sheriklariga oshirmaydi. Shunga qaramay, braziliyalik legioner «Yuve»da amaliyotga ega bo‘lish barobarida «A» seriyada samarali harakat qilayotgan himoyachilardan biriga aylanib ulgurdi. Biroq Alves xorvatdan yoshroq bo‘lgani uchun «Shaxtyor» afsonasini tanladik. Darvoqe, yaqinda Srnaning «Barselona»ga o‘tishi mumkinligi haqida ma’lumotlar tarqaldi.
Yordamchisi: Daniel Alves («Yuventus», 33 yosh )
Andrea Barsali («Yuventus», 35 yosh)
Buffonning «Oltin to‘p» uchun 30 nafar nomzodlar orasidan joy olishida kuchli himoyachilarning hissasi katta, lekin ularni negadir kam eslashadi va bu adolatdan emas. Chunki Bonuchchi ham, Barsali ham o‘z ishining haqiqiy ustalaridir. Ularning ikkinchisi hatto, 2006 yilgi jahon chempioni hisoblanadi. Amaldagi o‘yinchilar orasida esa bundaylar juda kam. Garchi Andrea ham abadiy bo‘lmasa-da, afsonalar ramziy terma jamoasida pand bermaydi.
Yordamchisi: Sesar Navas («Rostov», 36 yosh)
Jon Terri («Chelsi», 35 yosh)
Dastlab bu terma jamoada Terrining o‘rniga Pepeni qo‘ymoqchi bo‘lishgandi, lekin «Real» vakili «yosh»lik qildi. Shuning uchun dekabr boshida 36ga to‘lgan Jey Tining yoshi inobatga olindi. To‘g‘ri, Barsali yoki Pepening o‘yiniga solishtirganda, «Chelsi» afsonasiniki zo‘r emas. Umuman, bunday holat deyarli har bir yoshi katta himoyachida kuzatiladi, ammo ular Terri singari superyulduz va superveteran emaslar.
Yordamchisi: Luizao («Benfika», 35 yosh)
Patris Evra («Yuventus» 35 yosh)
Jahonda ko‘plab ajoyib chap qanot himoyachilari voyaga yetdi. Ulardan biri «Yuventus»da to‘p surib kelyapti. Patris Evra yoshiga qaramay, o‘zidan ancha kichik raqobatchilari bilan tengma teng kurash olib borib, hatto o‘yin amaliyotiga ham ega bo‘lib kelmoqda. Albatta, hozir u misol uchun, «Manchester Yunayted» yoki «Monako»da o‘ynagan paytlaridagidek serharakat emas, ammo fransuz futbolchisi yuqori sur’atga yarab, sovrinlari bisyor superveterandir. Bugunga kelib, Evraning o‘yini hammani lol qoldirmasligi mumkin, lekin 35 yoshli qanot himoyachisi uchun shunisi ham yomon emas.
Yordamchisi: Yuriy Jirkov («Zenit», 33 yosh)
Markaziy yarim himoyachilar
Xabi Alonso («Bavariya», 34 yosh)
Jahon va Yevropa chempioni, klublar darajasida talaygina sovrinlar sohibi, «Liverpul» va «Real» tarkibida Chempionlar Ligasi g‘olibi. Ajoyib va aqlli o‘yinchi hozirga qadar bundesliga yetakchisi safida ishonchli o‘yin namoyish etib kelyapti. Yaqinda Xabi 35 yoshni qarshiladi, lekin shunga qaramay, yozda Karlo Anchelotti «Bavariya»dan ispan futbolchisi bilan shartnomani uzaytirishni talab qildi. Italiyalik murabbiy bundan hech ham afsusda emas, axir Alonso o‘z ishining ustasi, boz ustiga, Alkantarani ko‘p narsalarga o‘rgatishi mumkin.
Yordamchisi: Garret Berri («Everton», 34 yosh)
Daniele De Rossi («Roma», 33 yosh)
Mazkur tarkibdan o‘rin olish uchun «Roma»ning 33 yoshli «to‘daboshisi»da tajriba yetarli. Mahoratli futbolchi oxirgi paytlarda yana turli xil yaxshi ishlari bilan ajralib turibdi. Yaqinda kasallikka chalingan jamoadoshi Florensining tashxisini bilish uchun hatto, u bilan bir kecha shifoxonada qolgan. So‘ngra qadrdon do‘stining tobuti ustiga jahon chempionligi uchun berilgan medalini qo‘ydi. Xullas, De Rossi «Roma»ga sodiq kamsonli o‘yinchilardan biridir va bu borada uni bemalol Tottining izdoshi deyish mumkin. O‘z vaqtida u ko‘plab klublardan kelgan takliflarni rad etgan, ayniqsa, «Yuventus»nikini.
Yordamchisi: Tiago Motta («PSJ», 34 yosh)
Hujum zvenosi
Dirk Kyuyt («Feyenoord», 36 yosh)
Umuman olganda, Yevropa bo‘ylab eski maktabning ajoyib hujumchilari «daydib» yurishibdi. Masalan, Milan Barosh hali-hanuzgacha «Slovan» tarkibida o‘ynayapti, Robin van Persi esa «Fenerbaxche» bilan Yevropa Ligasini zabt etish ilinjida. Biroq Dirk Kyuyt haqida bunday deb bo‘lmaydi. Hozir uning ishonchli o‘yinlari samarasi o‘laroq, «Feyenoord» chempionatda ishonch bilan peshqadamlik qilyapti. Ushbu universal hujumchidagi yuqori tayyorgarlik darajasiga aksariyat yosh hujumchilar havas qilishsa arziydi. Bu ta’riflarning bari 36 yoshli futbolchiga tegishli... aqldan ozish hech gapmas!
Yordamchisi: Robin van Persi («Fenerbaxche», 33 yosh)
Franchesko Totti («Roma», 40 yosh)
Bu futbolchi 40 yoshda ham taslim bo‘lmayapti. Tottining rafiqasi Spallettiga istagancha e’tirozlar bildirishi mumkin, lekin murabbiyga qoyil qolish kerak. U «Roma» afsonasini sal oldin yuzaga kelgan mojaroga qaramay, o‘z rejalariga kiritishga o‘zida kuch topa bildi. Franchesko yaxshi tayyorgarlikka ega va aqlli uzatmalari sonini o‘yindan-o‘yinga oshirib boryapti. Vaholanki, uning yoshida hamma o‘yinchilar ham «A» seriya yoki Yevropa Ligasining yuqori tempiga bardosh berolmaydilar. Totti esa o‘z ishining haqiqiy ustasi, bugungi ramziy terma jamoadagi yana bir jahon chempionidir.
Yordamchisi: Gabi («Atletiko», 33 yosh)
Frank Riberi («Bavariya», 33 yosh)
Chap qanotga ikki nafar o‘ziga xos xarakterga ega nomzodlar bor edi. Lekin Rikardo Kuarejma katta klublarda o‘zini ko‘rsata olmadi, Riberi esa «Bavariya» yulduziga aylandi. To‘g‘ri, u yozda milliy terma tarkibida Kuarejma kabi Yevropa chempioni bo‘lolmadi, shunga qaramay, ramziy jamoaga «Bavariya» a’zosi tanlandi. Yuqori texnikali portugal futbolchisini esa unga yordamchi qilib qo‘yamiz. Har holda, bu kabi veteranlar yaxshi o‘ynab turishsa, yoshlardan ikki barobar yuqori baholanishadi.
Yordamchisi: Rikardo Kuarejma («Beshiktosh», 33 yosh)
Markaziy hujumchi
Aris Aduris («Atletik», 35 yosh)
«MYU» hujumchisi Zlatan Ibragimovichning tarkibga kiritilmaganiga jiddiy bir sabab bor. Aniqrog‘i, «Atletik» a’zosi Aris Aduris uning yo‘liga g‘ov bo‘ldi. Agar shvesiyalik goleador ham ispaniyalik tengdoshiga o‘xshab yevrokubok bahslarida «penta-trik» qayd etganida, shubhasiz, ramziy jamoadan o‘rin olardi. Shuning uchun skandinaviyalik yulduz ortiqcha boshog‘riqsiz zaxiradan o‘rin egallamoqda. Joriy mavsum shved futbolchisi «MYU»da u qadar yorqin o‘yin namoyish etolmayapti, ammo bilbaolik to‘purar ishqibozlarni aqldan ozdiradigan darajada o‘zini ko‘rsatib kelmoqda. Ispaniyalik forvard 30 yoshdan keyin yanada kuchliroq o‘ynayotgandek tuyulmoqda. Bunday darajali halqaro musobaqada «penta-trik» qayd etilishi har kuni ham kuzatilmaydi. Oqibatda, uni Ispaniya terma jamoasiga ham chaqirishdi. Xullas, Adurisni tabriklaymiz.
Yordamchisi: Zlatan Ibragimovich («Manchester Yunayted», 35 yosh).
