Osiyo chempionlar ligasida saralash bosqichi yakuniga yetib, guruh bosqichida ishtirok etadigan barcha klublar nomi aniq bo‘ldi. Xabaringiz bor, OFK ushbu mavsumdan boshlab koeffisiyentlar jadvalini hisoblashda saralash bosqichidagi natijalarni ham inobatga olishga qaror qildi. OCHL saralashida ishtirok etgan "Nasaf" va "Bunyodkor" klublari O‘zbekiston hisobiga qancha ball keltirganini hisoblab ko‘ramiz.

Qoidaga ko‘ra, saralashdagi ishtirok uchun har bir jamoaga 0,3 balldan taqdim etiladi. Demak, 2ta klubimiz bu jihatdan 0,6 ballga ega bo‘lishgan. "Nasaf" dastlabki bosqichda "Al-Hidd" ustidan g‘alaba qozongani bois, yana 0,3 ballni taqdim etdi. "Bunyodkor" "Al-Jaish"ni penaltilar seriyasida mag‘lub etgani uchun 0,15 ochkoga ega bo‘ldi. Natijada O‘zbekiston saralash bosqichida jami 1,05 ballni qo‘lga kiritdi. Bu G‘arb mintaqasi mamlakatlari orasida eng yaxshi natija bo‘ldi.

Qatarning ikkita klubi saralashda penaltilar seriyasida yutqazgani bois 0,9 ballga ega bo‘ldi.

Umuman olganda, OCHL guruh bosqichida BAA, Saudiya Arabistoni va Erondan 4tadan, Qatar va O‘zbekistondan 2tadan klub ishtirok etadigan bo‘ldi. Guruh bosqichida jamg‘ariladigan ochkolar faqat guruh bosqichida ishtirok etadigan klublar soniga bo‘linadi va o‘rtacha ball hisoblanadi.

G‘arb mintaqasi mamlakatlari OCHL saralash bosqichida to‘plagan ochkolari:
O‘zbekiston — 1,05 ball
Qatar — 0,9
BAA — 0,6
Saudiya Arabistoni — 0,6
Eron — 0,45
Iordaniya — 0,3
Hindiston — 0,3
Bahrayn — 0,3