Kecha bo‘lib o‘tgan "Barselona" va "Atletiko" o‘rtasidagi Ispaniya kubogi yarim final bahsi juda shiddatli o‘tdi. Uch nafar futbolchi maydondan chetlatildi, Gameyro penaltidan foydalana olmadi, Grizmanning goli nohaq inobatga olinmadi, Messining jarimadan yo‘llagan kuchli zarbasi darvoza to‘siniga tegib qaytdi.

Quyida taqdim etilayotgan o‘yin statistikasi ahamiyat qaratsangiz, to‘pni nazorat qilish borasidagi ko‘rsatkich teng bo‘lganini ko‘rish mumkin. "Barsa" ijrosidagi o‘yinlarda bunday holat kamdan-kam qayd etiladi.

Bundan tashqari, "Atletiko" darvoza tomon berilgan zarbalar, xususan, aniq zarbalar soni bo‘yicha ustunlikka ega bo‘ldi. Bu zarbalar natijasida Silessen 4 marta seyv namoyish qilishga majbur bo‘ldi. Shuningdek, "matraschilar" 10 marta burchak to‘pini o‘yinga kiritishgan bo‘lsa, "ko‘k-anorranglilar" bu ishni atishi 3 marta amalga oshirishgan.

Umuman olganda, "Atletiko" o‘yin davomida ustunlikka ega bo‘lganini statistika ham ko‘rsatib turibdi. "Barselona" o‘z uyida durang o‘ynab, safarda g‘alaba qozongani bois Ispaniya kubogi finaliga chiqdi.

"Barselona" - "Atletiko" - 1:1
To‘p nazorati: 51% — 49%
Darvoza tomon zarbalar: 7 — 12
Aniq zarbalar: 3 — 5
Noaniq zarbalar: 3 — 5
To‘silgan zarbalar: 1 — 2
Jarima zarbalari: 15 — 13
Burchak to‘plari: 3 — 10
Ofsaydlar: 1 — 4
Seyvlar: 4 — 2