Italiya «A» seriyasi deganda hammaning yodiga birinchi navbatda «Yuventus», «Milan», «Inter» yoki «Roma» kabi jamoalar tushadi. Biroq, bu yerda gap mazkur grandlar haqida bormaydi. Italiyalik futbolchilarni tarbiyalab, voyaga yetkazishda boshqa klublar ham faol ishtirok etishadi. Misol tariqasida, bir qator yulduzlarni keltirib o‘tsa bo‘ladi, ammo ularning ko‘pchiligini shundog‘am butun dunyo taniydi. Joriy mavsumda esa ular safini yana bitta o‘yinchi to‘ldirayotgandek...

Har holda, «Torino» safidagi yorqin o‘yinlari orqali Andrea Belotti shunday fikr bildirishga majbur etayapti. Ushbu hujumchi yosh bo‘lishiga qaramay, seriya to‘purarlari ruyxatida bormoqda. Yana uni «Torino»dek o‘rtamiyona kollektivda o‘ynayotganini inobatga oladigan bo‘lsak, buni ajoyib ko‘rsatkich deyish mumkin. Shu yoshda hamma hujumchi ham Yevropaning top chempionatlaridan birida qobiliyatini unga o‘xshab ko‘rsatib berolmaydi. Vaholanki, Italiya oliy divizionida gol urish oson ish emas. Shuning uchun «Torino» a’zosini Yevropadagi mavsum kashfiyotlaridan biri desak adashmagan bo‘lamiz.

Qayerdan paydo bo‘ldi?

Italiya shimolida joylashgan Lombardiya ma’muriy viloyatida kichik shaharcha - Albino joylashgan bo‘lib, u mamlakat terma jamoasiga hujumchilarni tarbiyalab berish orqali mashhurlik darajasiga erishdi. Bu ishlar mahalliy klub - «Albinoleffe»da amalga oshiriladi. Bu yerlik odamlar uning tarkibida Juzeppe Sinyori, Filippo Indzagi kabi yulduzlarni ko‘rishgan. Yaqinda esa ular orasiga Italiya terma jamoasining yangi hujumchisi Andrea Belotti ham qo‘shildi. Yana shuni aytish kerakki, Indzagi aslida «Pyachensa»da tarbiyalangan. Rossiga kelsak, garchi u «Inter» maktabini o‘tgan bo‘lsada, birinchi klubi aynan «Leffe» bo‘lgan. Yuqoridagi o‘yinchilardan farqli o‘laroq, Albino yaqinida tug‘ilgan Belotti «Palermo»ga o‘tishidan oldin o‘n uch yoshidan boshlab «binafsharangli»lar sharafini himoya qilgan. Dastlabki mavsum Andrea uchun  quyi ligadagikelishilgan o‘yinlar orqali esda qoldi va buning oqibatida «Albinoleffe» jazoga tortilgan. Biroq shunga qaramay, u tajriba to‘plab bordi. Belotti keyinchalik hujumkor xavbek va vinger pozisiyasidan hujum  markaziga o‘tadi. S1 seriyadagi ketma-ket gollari oqibatida uni «Palermo»dagilar janubga olib ketishadi. Sisiliyaliklar safida ham u o‘z ishini yaxshi bajarishda davom etdi. Shunga qaramay, o‘sha paytlarda uni samarali markaziy hujumchi deyish qiyin bo‘lgan. Biroq «Palermo» tarkibida «A» seriyadagi birinchi mavsumidayoq to‘purarlik qobiliyatini ko‘rsatib qo‘ydi. 20 yoshli Belotti 24ta bellashuvda raqiblar darvozasini 10 marta aniq nishonga oldi. Aslida, yangi klubdagilar Andreadan ko‘ra Paolo Dibala haqida ko‘proq o‘ylashar va argentinalikni qimmatroqqa sotish maqsadida asosan unga o‘ynash imkonini berishardi. Xatto Paolo ketganidan so‘ng ham Belotti Sisiliya klubining asosiy tarkibiga kirolmadi. Natijada, «Torino» uni sotib olishdan cho‘chimadi. Turinliklar esa yuqori saviyadagi o‘yinlarda hali sinalmagan yosh iqtidorli futbolchi uchun 7,5 million yevro to‘lashga jazm qila olishdi.

Gollarga xo‘rozning aloqasi yo‘q

Ma’lumki, 2017 yil - xo‘roz yili. Buni qarangki, Andrea o‘z gollarini tirsagini peshonasiga qo‘yib shu hayvonga o‘xshab nishonlab kelayapti. Bu bilan u tojni ko‘z-ko‘z qilmoqda.  Ammo shunga qaramay, futbolchiga «Xo‘roz» laqabi berilmadi, aksincha, uning o‘zi «Gallo»ni tanladi. Bunga qisman do‘stining familiyasi va qisman o‘smirligidagi soch turmagini sabab sifatida ko‘rsatib o‘tish mumkin. Aslida, goh ahmoqqa, goh mag‘rurga o‘xshaydigan bu hayvon bilan uning hech qanday umumiy jihatlari yo‘q, negaki Belottiga jismonan kuchli, chidamli va kamtarin yigit sifatida qarashadi.  

Andrea qanday tarbiyalangan?

O‘yinchining atrofidagi odamlar uni barkamol hujumchi bo‘lib yetishishiga ta’sir qilarkan. Agar dadang mehnatsevarlik haqida gapirganida unga yaxshilab quloq solsang, Belottiga o‘xshab harakatchan hujumchiga aylanasan. Agar onang bilan buving futbolchi bo‘lasan deya ishonib qo‘llab turishsa, hattoki omadsiz o‘yinlardan so‘ng ham o‘zingga ishonishda davom etasan. Andreani yana yig‘loqi deb ham atashadi. U o‘smirlik yoshida amalga oshirilmagan  penaltilar va mag‘lubiyatlardan so‘ng bir necha bor yig‘i-sig‘i qilgan. Belotti buvisi bilan juda inoq. Bobosi esa u rosa kichkina bo‘lgan paytda olamdan o‘tgan, shunga bolani buvisi zerikib qolmasligi uchun yoniga yuborib turishgan. Hozir bu ayol uning asosiy muxlisi. Nabirasining mashg‘ulotlariga bolaligidanoq beri oziq-ovqatlar (buterbrod) tashib, och qolishiga yo‘l qo‘ymasdi. Otasi qurilishda ter to‘kar, onasining ishi ham og‘ir edi. Kichik shaharchadagi oddiygina mehnatkash oila. Belotti o‘z ishi orqali oilasini ta’minladi va endi onasining tinmay ishlashiga hojat yo‘q. Ayniqsa, otasi Milandagi qurilishda jarohat olgach, mas’uliyati yanada ortdi.  To‘g‘rida, axir, ota-onalar qariydilar va o‘z-o‘zidan Andrea endi ular uchun ham javobgar. Hujumchining o‘ziga esa sisiliyalik Jorjiya ismli qorasoch xonim g‘amxo‘rlik qilib kelayapti. Go‘zal qizning gaplariga qaraganda, Andrea o‘ta to‘g‘ri va zerikarli inson emish.

Belottining ustunligi. Mehnatsevarlik

Oddiygina yigitcha bo‘lib yurgan paytida Andrea otasining yaxshigina maslahatini eslab qolgan. «Agar o‘yindan keyin o‘zingni limonga o‘xshab siqib olgandek xis etmasang,  demak o‘zingni yuz foiz o‘yinga baxsh etmagansan». Belotti juda mehnatsevar hujumchi va uning o‘yin uslubi Turin shahri ramziga rosa mos tushadi - «Milan»ning sobiq a’zosi va Italiya terma jamoasining 20 yoshgacha bo‘lgan murabbiyi Evani u haqda shunday deydi: «U bizning birinchi hujumchimiz va birinchi himoyachimiz». Belotti doim o‘yinda to‘p uchun oxirigacha kurash olib boradi. Qisqasi, mehnatsevarlik - uning asosiy ustunligidir.

Kumiri - Andrey Shevchenko

O‘yin temperamenti bo‘yicha Belotti ko‘proq Vardi yoki Karlos Tevesning yoshligiga o‘xshab ketadi. Gohida Kristian Vyeriga taqqoslashadi, ammo «bobo» unga qaraganda yirikroq. Janluka Vialliga ham qiyoslashadi. Lekin Andreaning eng sevimli hujumchisi shak-shubhasiz Andrey Shevchenkodir. U «Milan» hujumchisiga bolaligidan muxlislik qilib kelgan. Xo‘sh, Belotti nimasi bilan «rassoneri»lar afsonasiga o‘xshab ketadi? Hujumda tezkor qaror qabul qilishi, zarba berish uslublari, har qanday holatdan turib chap, o‘ng oyog‘i va boshi bilan zarba bera olishi ukrainalik yulduzni eslatib yuboradi. Agar yelkasi chiqqanligi bo‘lmaganida, umumiy planda ularning tashqi ko‘rinishini adashtirib yuborish ham mumkin bo‘lardi - taxminan bir xil bo‘y va komplektasiyaga ega o‘yinchilar. Hattoki Belotti Shevchenkoga qaraganda kamroq yiqiladi. To‘g‘ri, uning qadamlari kumirinikiga o‘xshab u qadar keng bo‘lmasligi mumkin, ammo chopishga kelganda undan qolishmaydi. Garchi, ular bir-biriga tubdan o‘xshashmasada, Gattuzo va boshqa italiyalik mutaxassislar Andreaning o‘yinida aynan Shevaning harakatlarini ko‘rishmoqda. Hujumchini shug‘ullantirgan Jennaroning fikricha, u Shevchenko davridan beri mashg‘ulotlarda bunday sovuqqonlik bilan ko‘p gol ura oladigan odamni ko‘rmagan ekan. Darvozadan uzoqda Belotti o‘z o‘yin uslubiga ega, lekin oldinda harakat qilish bobida aynan Andrey Nikolayevichdan ko‘p narsalarni o‘rgana yaxshi bo‘lardi. Ustiga-ustak, Belotti shu darajada Shevaning fanatiki, hatto o‘zining tarmoqdagi sahifasida ukrainalik sobiq goleadorni tug‘ilgan kuni bilan doimiy ravishda tabriklab keladi.

Italiyada Buffondan keyin ikkinchi

Yaqinda «Yuventus» darvozaboni Janluidji Buffon Italiya terma jamoasining 2016 yildagi eng yaxshi o‘yinchisi uchun atalgan «Moviy to‘p» sovrinini qo‘lga kiritdi. Bu mukofot ishqibozlar tomonidan taqdim etiladi. Ikkinchi o‘rinni esa 27 foiz ovoz bilan Yevro-2016da hatto o‘ynamagan Belotti egalladi.

G‘olib bo‘lgan Buffon 37 foiz jamg‘ardi. O‘z navbatida «Torino» vakili 19 foiz olgan Leonardo Banuchchidek o‘yinchini ortda qoldirdi. Terma jamoadagi debyutini bor-yo‘g‘i 2016 yilning sentyabr oyida o‘tkazgan yosh yigit uchun bu hayratomuz yuksalish bo‘ldi. JCH-2018 saralash o‘yinlarining beshtasida u uchta gol urishga ham ulgurdi. Hujumchi yaxshi sport formasida, fanatlar esa uni darhol yoqtirib qolishdi. Vaholanki, terma jamoada ovoz berish uchun qahramonlar yetarli edi. Ammo darvoza oldida bunday ishonch bilan o‘ynaydigan markaziy hujumchi Italiya termasida anchadan beri paydo bo‘lmayotgandi. Masalan, Germaniya termasi menedjeri Oliver Birxoff, uning jamoasi o‘z tarkibida aynan shunga o‘xshagan markaziy hujumchiga ega bo‘lishni orzu qilayotganini ma’lum qilib o‘tgandi.

Belotti «Arsenal» va APLga to‘g‘ri keladi

«Torino» sport direktori Janluka Petrakkining ma’lum qilishicha, yaqinda turinliklar «Arsenal»dan 65 million yevrolik taklif olishgan. Biroq uning gaplariga qaraganda, bu summa o‘yinchining narxiga aslo to‘g‘ri kelmaydi. Yaqinda esa uning o‘zi 40 million haqida so‘z yuritgandi. Ma’lum bo‘lishicha, «Torino» hujumchi bilan shartnomani uzaytirib, uning punktiga 100 million yevrolik summani kiritib qo‘ydi. O‘z-o‘zidan tushunarli, turinliklar narxni juda osmonga ko‘tarib yuborishgan. Shunday bo‘lsada, agar Arsen Venger futbolchi uchun shu pulni berishga jazm qila olsa, demak unda nimanidir ko‘ra olgan.

«Arsenal»ning unga qiziqib qolgani ham tushunarli, chunki o‘tgan yozda «Lester» hujumchisi so‘ngi pallada Vengerga rad javobini bergan.

Inglizlar safida Belotti chililik Sanches bilan yaxshi juftlik bo‘la olishi mumkin va hattoki, Aleksis jamoadan ketgudek bo‘lsa uning o‘rnini egallashi ham hech gap emas. Avvalroq «kanonir»lar urugvaylik Luis Suaresni qo‘lga kiritishga urinib ko‘rishgandi, biroq uni ko‘ndira olishmadi. Buni qarangki, Belotti aynan uning «paroda»sidagi hujumchi. Xullas, sermahsul o‘yinchi ko‘pchilikka kerak, shuning uchun ham «Torino» qo‘rqmasdan katta summalarni e’lon qilayapti. Aytish lozimki, «Arsenal» unga yagona xaridor emas va Belottini katta klubda kutib qolamiz. Italiyada kuchli hujumchi yetishib chiqqan yoki chiqmaganini o‘shanda ko‘ramiz. Hozircha esa, shu maqsad yo‘lida judayam qattiq harakat qilayotgan yigitni ko‘rib turibmiz.

Andreani kim qo‘lga kiritishi mumkin?    

Agar to‘g‘ri yondashuv bo‘lsa bunday yigit hech qayerda o‘zini yo‘qotib qo‘ymaydi. «Oltin to‘p»ning o‘tmishdagi sohibi Paolo Rossi bekorga uni Luis Suaresga o‘xshatmayapti. Jismoniy kuch va hujumlarni aniqlik bilan yakunlash borasida chindan ham ular bir-birlariga o‘xshab ketishadi. «Arsenal»dan tashqari, Belottiga APLning boshqa bir vakili - «Manchester Yunayted» ham qiziqib kelayapti. Har qoldi manbalarda shunday mish-mishlar yuribdi. Italiyaning o‘zida esa «Napoli» birinchi raqamli da’vogar sanaladi.

Belottining o‘ziga nima kerak? Pul emasligi aniq. Boisi, uning yangi ulushi misol uchun, «Zenit»dagi Robert Makniki bilan teng va shikoyat qilishiga o‘rin yo‘q. Lekin shunga qaramay, Andrea bu borada xavotir olmasa ham bo‘laveradi. Agar inglizlar unda bo‘lajak yulduzni ko‘rishayotgan bo‘lishsa, maydondagi muvaffaqiyatlar bilan mablag‘ ham kelaveradi.

Ma’lumot uchun

Andrea Belotti

Yoshi: 23da (20 dekabr 1993 yil)

Pozisiyasi: markaziy hujumchi

Klubi: «Torino» (2021 yilning yozigacha)

Transfer narxi: 65 million yevro (tovon summasi 100 million)

Da’vogarlar: «Arsenal», «Napoli», «Manchester Yunayted»

«A» seriyadagi statistikasi: 19ta o‘yin, 14ta gol, 3ta golli uzatma

Italiya terma jamoasida: 5ta o‘yin, 3ta gol