"Olmaliq"ning Antaliyada tashkil etgan o‘quv-mashg‘ulot yig‘ini yakuniga yetdi.
Jamoa dastlabki xorijiy o‘quv-mashg‘ulot yig‘inini 11-25 yanvarda tashkil etgandi. Yig‘in davomida uch marta o‘rtoqlik o‘yini o‘tkazib, ikki g‘alaba va bir mag‘lubiyat qayd etgandi. 30 yanvarda jamoa navbatdagi o‘quv-mashg‘ulotlarini ham xorijda, Turkiyaning Antaliya shahrida davom ettirish uchun yo‘l oldi. Bu galgi jarayon 20 fevralga qadar davom etdi.
Bu vaqt mobaynida jamoa 6ta o‘rtoqlik o‘yini o‘tkazdi. Bunda 1 g‘alaba, ikki durang va 3 mag‘lubiyat qayd etildi. Har ikki yig‘inda jamoa safida bir qator xorijlik futbolchilar ko‘rikdan o‘tishdi. Umumiy xulosa qilsak, jamoaning yangi mavsum uchun tayyorgarlik jarayoni reja asosida a’lo darajada o‘tdi.
Yig‘in yakunida jamoa bosh murabbiyi Viktor Kumikov fikrlari bilan qiziqdik.
- Jamoamizning bu galgi o‘quv-mashg‘ulot yig‘ini ham rejalashtirganimizdek o‘tdi. Yig‘in davomida bir qator nazorat o‘yinlari o‘tkazib, turli taktik ishlanmalarni sinovdan o‘tkazdik. Bu o‘yinlarda natija birinchi o‘ringa qo‘yilmaydi. Eng asosiysi futbolchilarni nechog‘li mavsumga tayyorligini ko‘zdan kechirib oldim. Ayni vaqtda 2017 yilgi mavsumda jamoa sharafini himoya etuvchi tarkibimiz aniq bo‘ldi. Mavsumga tayyorgarlikning so‘nggi bosqichi 24 fevraldan Toshkentda davom ettiriladi va u "Buxoro" bilan o‘tadigan birinchi tur o‘yiniga qadar bo‘ladi. Bu oraliqda yana bitta nazorat o‘yini o‘tkazishni rejaga kiritganmiz.
