Bugun Yevropa Ligasi, Yevropa Chempionlar ligasi va Ispaniya chempionatidan o‘rin olgan uchrashuvlar bo‘lib o‘tadi.
Yurtimizdagi millionlab futbol muxlislarining talab va istaklarini inobatga olib, telekanalimiz shu kungi barcha muhim futbol uchrashuvlarini jamlashga harakat qiladi.
Demak, bugun Toshkent vaqti bilan soat 22:00da Yevropa ligasi 1/16 final javob o‘yinidan o‘rin olgan “Sent-Etyen” – “Manchester Yunayted” uchrashuvi boshlanadi. Ushbu o‘yinning 1-taymi tugagach, soat 22:45da Ispaniya chempionati 16-turining qoldirilgan uchrashuvi “Valensiya” – “Real Madrid” o‘yini boshlanadi. “Sent-Etyen” – “MYU” o‘yinining 2-taymi va “Valensiya” – “Real Madrid” uchrashuvining 1-bo‘limi onlayn tarzda, bir vaqtning o‘zida translyasiya qilinadi. Ikkala uchrashuvdagi gollar hamda muhim vaziyatlar jonli efirda namoyish qilinadi.
“Sent-Etyen” – “MYU” o‘yini tugagach, muxlislar e’tibori “Mestalya” stadionida davom etayotgan uchrashuviga qaratiladi va “Valensiya” – “Real Madrid” o‘yinining 2-taymi to‘liq efirga uzatiladi.
Bu o‘yin o‘z yakuniga yetgach, UZREPORT TV telekanalida Yevropa Chempionlar ligasi 1/8 finalidan o‘rin olgan “Portu” – “Yuventus” uchrashuvi translyasiyasi boshlanadi.
Shu tariqa tomoshabinlar UZREPORT TV telekanalida soat 21:50dan boshlab uzluksiz 02:45gacha davom etadigan futbol marafonidan bahra olishlari mumkin bo‘ladi.
