Бугун Европа Лигаси, Европа Чемпионлар лигаси ва Испания чемпионатидан ўрин олган учрашувлар бўлиб ўтади.
Юртимиздаги миллионлаб футбол мухлисларининг талаб ва истакларини инобатга олиб, телеканалимиз шу кунги барча муҳим футбол учрашувларини жамлашга ҳаракат қилади.
Демак, бугун Тошкент вақти билан соат 22:00да Европа лигаси 1/16 финал жавоб ўйинидан ўрин олган “Сент-Этьен” – “Манчестер Юнайтед” учрашуви бошланади. Ушбу ўйиннинг 1-тайми тугагач, соат 22:45да Испания чемпионати 16-турининг қолдирилган учрашуви “Валенсия” – “Реал Мадрид” ўйини бошланади. “Сент-Этьен” – “МЮ” ўйинининг 2-тайми ва “Валенсия” – “Реал Мадрид” учрашувининг 1-бўлими онлайн тарзда, бир вақтнинг ўзида трансляция қилинади. Иккала учрашувдаги голлар ҳамда муҳим вазиятлар жонли эфирда намойиш қилинади.
“Сент-Этьен” – “МЮ” ўйини тугагач, мухлислар эътибори “Месталья” стадионида давом этаётган учрашувига қаратилади ва “Валенсия” – “Реал Мадрид” ўйинининг 2-тайми тўлиқ эфирга узатилади.
Бу ўйин ўз якунига етгач, UZREPORT TV телеканалида Европа Чемпионлар лигаси 1/8 финалидан ўрин олган “Порту” – “Ювентус” учрашуви трансляцияси бошланади.
Шу тариқа томошабинлар UZREPORT TV телеканалида соат 21:50дан бошлаб узлуксиз 02:45гача давом этадиган футбол марафонидан баҳра олишлари мумкин бўлади.
