O‘tgan yozda «Real»dan «PSJ»ga o‘tgan Xese Rodriges Fransiya chempioni tarkibida o‘z o‘rnini topa olmay La Ligaga qaytdi va hozirda «Las Palmas» tarkibida o‘ynamoqda. 1-mart kuni u jamosi bilan «Santyago Bernabeu»da mehmon bo‘ladi. Shu munosabat bilan Goal.com nashri «Real»ni eng qimmat transfer narxida tark etgan tarbiyalanuvchialri o‘nligini taqdim etdi.

10. Samyuel Eto'O «Real»dan «Malyorka»ga 4 million yevro evaziga o‘tgan edi. «Barselona» va «Inter» tarkibida Chempionlar Ligasini yutgan kamerunlik hujumchi keyinchalik «Anji», «Chelsi», «Everton», «Sampdoriya» tarkibida o‘ynashga ham ulgurdi, hozirda esa Turkiyaning «Antalyaspor» klubida to‘p surmoqda.

9. Roberto Soldado – 6 million yevro evaziga «Xetafe»ga sotilgan ispaniyalik hujumchi keyinchalik «Valensiya» va «Tottenhem» safida o‘ynadi, hozirda esa «Vilyarreal» a’zosi hisoblanadi.

8. Diyego Lopes – 7 million yevroga «Vilyarrel»ga sotilgan va faoliyatining katta qismini shu jamoad o‘tkazgan. Qisqa muddat davomida «Sevilya» darvozasini qo‘riqlagach esa Lopes «Real»ga qaytib Iker Kasilyasning o‘rnini egallagan edi. Keylor Navas kelgach esa «Milan»ga ketgan darvozabon hozirda ijara asosida «Espanyol»da to‘p surmoqda.

7. Xavi Garsiya – 7 million yevroga «Benfika»ga sotilgan ispaniyalik yarim himoyachi keyinchalik bir muddat «Manchester Siti»da ham to‘p surdi. Hozirda u Sankt-Peterburgning «Zenit» jamoasida o‘ynamoqda.

6. Denis Cherishev – 7 million yevro evaziga «Vilyarrel»ga o‘tgan. Rossiyali futbolchi avvalroq «Sevilya», «Vilyarreal» va «Valensiya»ga ijaraga berilgan. O‘tgan mavsumda esa «Real» uni Qirol kubogida maydonga tushirgani uchun musobaqadan chetlatilgan edi.

5. Esteban Granero – 8 million yevro, «Kuinz Park Reynjers». Ispaniyalik futbolchi avvalroq «Xetafe»ga ijaraga berilgan, «KPR»ga o‘tgach esa avval «Real Sossedad»ga ijaraga berilgan va keyin San-sebastyanliklarga sotib yuborilgan, hozirda aynan shu jamoada to‘p surmoqda.

4. Xose Kalyexon – «Real»da tarbiyalanib, bir muddat «Espanyol»da to‘p surgan Kalyexon Madridga qaytgach 9,5 million yevro evaziga «Napoli»ga transfer qilingan edi.

3. Alvaro Negredo – «Sevilya»ga 15 million yevro evaziga sotilgan. Ispaniyalik hujumchi bungacha «Rayo Valekano» va «Almeriya» safida o‘ynashga ham ulgurgan. «Sevilya»dan keyin esa «Manchester Siti»ga o‘tib, «Valensiya»ga ijaraga berilgan. «Valensiya»ga to‘liq o‘tgach, hozirda ijara asosida «Midlsbro»da to‘p surmoqda.

2. Alvaro Morata – «Yuventus»ga 20 million yevro evaziga sotilgan. Turinliklar safida ajoyib ikki mavsum o‘tkazgan Morata 30 million yevro evaziga «Real»ga qaytdi.

1. Xese Rodriges – 25 million yevro evaziga «PSJ»ga transfer qilingan. Parijda o‘z o‘rnini topa olmagan Xese ushbu qishda ijara asosida o‘z ona shahri Las Palmasga qaytdi va 1-mart kuni Madridda «Real»ga qarshi o‘ynaydi.