Sherali Boboqulov boshchiligidagi O‘zbekiston ayollar terma jamoasi 7-13 mart kunlari Birlashgan Arab Amirligining Dubay shahrida o‘quv-yig‘in mashg‘ulotlarini o‘tkazadi.
Terma jamoa futbolchilari 6-7 mart kunlari Toshkentda yig‘in o‘tkazishadi va 7 mart kuni Toshkentdan BAAning Dubay shahriga jo‘nab ketadi.
Ushbu yig‘in mobaynida O‘zbekiston ayollar terma jamoasi 9 va 12 mart kunlari BAA ayollar termasi bilan ikkita o‘rtoqlik uchrashuvi o‘tkazishni rejalashtirilgan.
Yig‘inga “Sevinch” jamoasining besh nafar futbolchisi jalb etildi. Bular, darvozabonlar – Laylo Tilavova, Maftuna Jonimqulova. Himoyachi – Maftuna Shoyimova. Yarim himoyachi Kamola Riskiyeva va hujumchi – Nilufar Qudratova.
O‘zbekiston ayollar terma jamoasi Osiyo Kubogi–2018 saralash bosqichi “B” guruhidan joy olgan bo‘lib, final bosqichiga chiqish uchun Janubiy Koreya, Gonkong, Hindiston va KXDR ayollar termasiga qarshi bahs olib boradi.
BAA saralashning “A” guruhidan o‘rin olgan hamda final bosqichi yo‘lida Iordaniya, Filippin, Bahrayn, Iroq va Tojikiston ayollar terma jamoasiga qarshi kuch sinashadi.
Ma’lumot uchun, O‘zbekiston ayollar terma jamoasi FIFA reytingida 42-o‘rinda (1540 ochko) bormoqda. BAA ayollar termasi 1280 ochko bilan 78-pog‘onani band qilgan.
