Mamlakat yoshlar birinchiligining dastlabki turida yosh “navbahorchilar” Toshkentning “Obod” jamoasini qabul qildi.
To‘raqo‘rg‘ondagi “Yoshlik” o‘yingohida bo‘lib o‘tgan uchrashuvda “navbahorchilar” 1:2 hisobida imkoniyatni boy berishdi.
O‘yinning birinchi bo‘limidagi voqealar rivoji asosan markazda kechdi. Har ikki tomon futbolchilari mavsum endi boshlanganligi sababli bir-birlari bilan o‘zaro bog‘liqlik borasida bir qator qiyinchiliklarga duch kelishdi. Uchrashuv boshlarida Akbarali Xoldorov “Obod” darvozaboni bilan yakkama-yakka vaziyatga chiqqan bo‘lishiga qaramay, yakuniy zarbani aniq yo‘llay olmadi. Oradan biroz vaqt o‘tib, mehmonlar hujumchisi Idris Bikmaykinda ham gol urish uchun imkoniyat bo‘lgandi. Lekin, uning tepgan to‘pi darvoza ustuni va to‘sini kesishgan joyga tegib maydonni tark etdi.
Birinchi bo‘lim yakunlanishi arafasida Bilolxon Tojimirzayev raqib himoyachisining xatosidan so‘ng, Ahmedov bilan yakkama-yakka vaziyatga chiqib, darvozani aniq nishonga olib hisobni ochdi. Tanaffusdan keyin “Obod” tarkibida o‘zgarishlar ro‘y berdi. O‘z navbatida mehmonlarning harakatida ham faollik ko‘zga tashlandi. Doniyor Nasriddinov himoyamizda yuzaga kelgan xatolikdan so‘ng Ashurmatovni aldab o‘tib, Abdullo Mahkamovga qulay vaziyat yaratib berdi. Mahkamovga yaqin masofadan bo‘sh qolgan darvozani nishonga olish qiyinchilik tug‘dirmadi. Hisob tenglashgach, “navbahorchilar” g‘alabani ta’minlash maqsadida hujumga zo‘r berishdi.
“Navbahor”ni oldinga olib chiqish uchun G‘olibbek Karimov, Javohir Olimjonov va Abdulaziz Jalilovda imkoniyatlar bo‘lsa-da, vaziyatlarni golga aylantirish nasib etmadi. 82-daqiqada esa “navbahorchi” Ilhom Aliboyev hakamning qaroriga e’tiroz bildirgani sababli qizil kartochka bilan jazolandi. Kamchilikda qolgan “navbahorchilar” uchrashuvning yakuniy qismini munosib tarzda o‘tkaza olishmadi. O‘yin yakunlanib borayotgan bir pallada Abbos Isroilov olis masofadan aniq zarba yo‘llab “Obod”ning g‘alabasini ta’minladi. Bu paytga kelib “navbahorchilar”da hech bo‘lmaganda durangni ta’minlash uchun ham deyarli vaqt qolmagandi. Shu tariqa yosh “navbahor”chilar 2017 yilgi birinchilikni mag‘lubiyat bilan boshladi.
“Navbahor” – “Obod” – 1:2 (1:0). 3 mart. To‘rqo‘rg‘on. “Yoshlik” o‘yingohi.
Hakamlar: A.Rahimov, E.Tursunov, A.Jabborov, M.Mamatxanov.
Nazoratchi – A.Hotamov.
“Navbahor”: 12. N.Ashurmatov, 9. I.Abduqodirov, 10. I.Aliboyev, 14. H.YUnusov, 21. B.Toshmirzayev, 26. J.Olimjonov, 27. SH.Ahmadaliyev, 28. G‘.Karimov, 48. D.Mahmudov (35. M.Abdullayev, 62), 51. A.Xoldorov (63. A.Jalilov, 72), 88. A.Nishonboyev (99. A.Jo‘rayev, 86).
“Obod”: 12. A.Ahmedov (20. U.Inoyatullayev, 46), 3. A.Isroilov, 5. A.Tilapov (I.Ismoilov, 46), 7. D.Nasriddinov (11. SH.To‘xtasinov, 66), 27. X.Abdualimov (4. A.Olimov, 90+1), 30. I.Jasurxo‘ja (10. O.Pardabayev, 70), 44. J.Omonov, 66. X.G‘aniyev (8. D.YOqubjonov, 64), 70. F.Mahammadjanov, 77. D.Jo‘raboyev, 80. I.Bikmaykin (9. A.Mahkamov, 58).
Gollar: B.Toshmirzayev (40) – A.Mahkamov (63), A.Isroilov (90+2).
Ogohlantirish: G‘.Karimov (5).
Chetlatish: I.Aliboyev (82).
