Ozarbayjonning Boku shahrida davom etayotgan sport gimnastikasi bo‘yicha jahon kubogida hamyurtimiz Oksana Chusovitina oltin medal sohibiga aylandi.
Olimpiya o‘yinlarida ishtirok etish bo‘yicha mutloq rekordchi va Olimpiada chempioni Oksana bugun bo‘lib o‘tgan hal qiluvchi bahslarda 14,333 ball to‘plab birinchi o‘rinni egalladi.
“Bugungi ishtirokimdan mamnunman. Musobaqada raqobat juda ham kuchli bo‘ldi va men unda zafar quchganimdan juda ham hursandman. Men o‘z sakrashimni aynan mazkur Kubok uchun tayyorlayotgan edim. Men murakkab elementlarni amalga oshirmadim, shu sabab ham g‘alaba qozonganim bu haqiqiy omad", - deydi Oksana.
41 yoshli sportchimiz yaqin orada o‘z faoliyatini yakunlash istagida emasligini va keyingi Olimpiadada ham ishtirok etish niyatida ekanligini aytib o‘tgan edi.
“Bu turnir Monrealda bo‘lib o‘tadigan Jahon chempionatiga tayyorgarlik vazifasini o‘taydi. Nasib etsa, 2020-yilda ham Bokuga tashrif buyuraman va bu safargi bahs men uchun Olimpiadaga tayyorgarlik sifatida bo‘ladi”, - deydi sportchimiz.
Eslatib o‘tamiz, mazlur jahon kubogi 16-19 mart sanasiga qadar o‘tkazilmoqda. Bahslar esa Boku shahridagi Milliy gimnastika arenasida bo‘lib o‘tmoqda. Unda jami 23ta davlat vakillari 10 ta medallar jamlanmasi uchun kurash olib borishyapti.
