Озарбайжоннинг Боку шаҳрида давом этаётган спорт гимнастикаси бўйича жаҳон кубогида ҳамюртимиз Оксана Чусовитина олтин медал соҳибига айланди.

Олимпия ўйинларида иштирок этиш бўйича мутлоқ рекордчи ва Олимпиада чемпиони Оксана бугун бўлиб ўтган ҳал қилувчи баҳсларда 14,333 балл тўплаб биринчи ўринни эгаллади.

“Бугунги иштирокимдан мамнунман. Мусобақада рақобат жуда ҳам кучли бўлди ва мен унда зафар қучганимдан жуда ҳам ҳурсандман. Мен ўз сакрашимни айнан мазкур Кубок учун тайёрлаётган эдим. Мен мураккаб элементларни амалга оширмадим, шу сабаб ҳам ғалаба қозонганим бу ҳақиқий омад", - дейди Оксана.

41 ёшли спортчимиз яқин орада ўз фаолиятини якунлаш истагида эмаслигини ва кейинги Олимпиадада ҳам иштирок этиш ниятида эканлигини айтиб ўтган эди.

“Бу турнир Монреалда бўлиб ўтадиган Жаҳон чемпионатига тайёргарлик вазифасини ўтайди. Насиб этса, 2020-йилда ҳам Бокуга ташриф буюраман ва бу сафарги баҳс мен учун Олимпиадага тайёргарлик сифатида бўлади”, - дейди спортчимиз.

Эслатиб ўтамиз, мазлур жаҳон кубоги 16-19 март санасига қадар ўтказилмоқда. Баҳслар эса Боку шаҳридаги Миллий гимнастика аренасида бўлиб ўтмоқда. Унда жами 23та давлат вакиллари 10 та медаллар жамланмаси учун кураш олиб боришяпти.