Angliya chempionatining 29-turi doirasida «Manchester Siti» va «Liverpul»o‘rtasida markaziy o‘yin bo‘lib o‘tdi. Hujumkor va golli vaziyatlarga boy bo‘lgan o‘yinda jangovar durang qayd etildi.
Gvardiola shogirdlari to‘pni nazorat qilib, kombinasion o‘yin ko‘rsatishga harakat qilgan bo‘lsalar, mersisaydliklar qarshi hujumlarda raqibni jazolash payida bo‘ldilar. Tanaffusga qadar hisobning ochilmaganiga ko‘proq hakam sababchi bo‘ldi. Maykl Oliver har ikkala jamoa foydasiga bir necha martadan penalti belgilamadi.
Ikkinchi bo‘lim boshida Klishining qo‘polligi tufayli hakam "Siti" darvozasiga 11 metrli jarima zarbasi qo‘ydi va uni "shtatdagi penaltichi" Milner aniq amalga oshirdi. Oradan ko‘p o‘tmasdan Firmino o‘yin taqdirini hal qilib qo‘yishi mumkin edi, ammo uning zarbasini Kabalyero bartaraf etdi.
Bahsning 69-daqiqasida Kevin de Bryuyne o‘ng qanotdan yetkazib bergan zargarona uzatmani Aguero darvozaga burib qo‘ydi — 1:1.
O‘yin so‘ngida har ikkala jamoada o‘ta qulay vaziyatlar yuzaga keldi. Ammo Lallana va Aguero (2 marta) juda yaqinm masofadan darvozaga aniq zarba bera olishmadi. Aks holda g‘alabani jamoalardan biri ilib ketishi mumkin edi.
Ushbu durang tufayli "Manchester Siti" 3, "Liverpul" to‘rtinchi pog‘onani saqlab qolishdi.
APL, 29-tur, 21:30
"MANCHESTER SITI" - "LIVERPUL" 1:1 (0:0)
Gollar: 0:1 – 51, penalti Milner, 1:1 – 69 Aguero.
Manchester Siti – Kabalyero, Klishi, Stounz, Otamendi, Fernandinyo, Sane (Fernando, 83), Ture (Sanya, 65), Sterling, Silva, de Bryuyne, Aguero.
Liverpul – Minyole, Klavan, Matip, Klayn, Koutinyo (Origi, 73), Veynaldum, Firmino (Leyva, 89), Lallana, Mane, Djan, Milner.
Ogohlantirishlar: Firmino (16), Ture (22), Matip (43), Klishi (50), Silva (50), Mane (89).
