"Manchester Siti" bosh murabbiyi Xosep Gvardiola Angliya chempionatining 29-turida "Liverpul" bilan uchrashuvdagi durangdan so‘ng (1:1) fikrlarini bildirdi.

"Jamoaning o‘yinidan ko‘nglim qanchalik to‘ldi? Siz tasavvur ham qilolmaysiz. Bu mening murabbiylik faoliyatimdagi eng baxtli kunlardan biri bo‘ldi. Men jamoam bilan juda faxrlanaman.

Chempionlar ligasidagi mag‘lubiyatdan so‘ng mashg‘ulotlar bazamizda hech kim bir necha kun bir-biri bilan gaplashmadi. Hamma qayg‘uda edi. Bugun biz "Liverpul" bilan, yevrokubokda qatnashmayotgan va yaxshi tayyorrgarlikka ega jamoa bilan o‘ynadik.

"Manchester Siti" ko‘proq golli vaziyatlar yaratdi. Muammomiz shundaki, biz qulay vaziyatlardan ham foydalana olmayapmiz. Ammo biz jamoaviy ruhiyatni ko‘rsata oldik, bu bizga "Monako" bilan uchrashuvda yetishmagan edi.

Bu uchrashuv oldidan jamoamizdagi ahvolni tushunish kerak. Men uchun bugun ajoyib o‘yinchilarga ega top-klub bilan o‘ynaganimiz ko‘p ahamiyatga ega. Shuning uchun mamnunman", - deydi Gvardiola.