Bugun Avstraliyaning Melburn shahrida Formula 1 poygalari bo‘yicha mavsumning ilk gran prisi bo‘lib o‘tdi.

Yangi rahbariyat kelgach “qirollik poygalari” ham yanada tezkor va yanada tomosha bop bo‘ldi deyish mumkin. Bunga saralash bahsida Mersedes jamoasi vakili Lyuis Hemilton tomonidan trassaning yangi rekordi o‘rnatilgani misol bo‘la oladi.

Poyga ham saralash bahsida bo‘lgani singari qiziqarli va murosasiz ruhda o‘tdi. Ferrari va Mersedes bolidlari g‘oliblik uchun da’vogarlik qilishdi.

Poulni qo‘lga kiritgan britaniyalik Hemilton startda yetakchilikni o‘zida saqlab qolgan bo‘lsada birinchi pitstopdan so‘ng asosiy raqibi Sebastian Fettelni oldinga o‘tkazib yubordi va poyga yakuniga qadar Ferrari bolidiga yaqinlasha olmadi.

3-pog‘ona uchun ham Mersedes va Ferrari jamoasining finlandiyalik vakillari Valteri Bottas va Kimi Raykonen bahs olib borishdi. Yakunda Bottas 3-o‘rinni o‘zida saqlab qola oldi va shoxsupaga ko‘tarildi.

Red Bull jamaoasi a’zosi Maks Ferstappen bu gran prida o‘z imkoniyati darajasida ishtirok eta olmadi 5-pog‘ona bilan cheklandi. Uning jamoadoshi va mezbon poygachi Daniel Rikkiardo esa boliddagi muammolar sabab poygani erta yakunlashga majbur bo‘ldi.

Shu tariqa 2012-yildan buyon ilk marta Fettel yana turnir jadvalida peshqadamga aylandi. Germaniyalik poygachi italiyan bolidida o‘zining 4-g‘alabasini qo‘lga kiritdi.