Бугун Австралиянинг Мелбурн шаҳрида Формула 1 пойгалари бўйича мавсумнинг илк гран приси бўлиб ўтди.

Янги раҳбарият келгач “қироллик пойгалари” ҳам янада тезкор ва янада томоша боп бўлди дейиш мумкин. Бунга саралаш баҳсида Мерседес жамоаси вакили Люис Ҳемилтон томонидан трассанинг янги рекорди ўрнатилгани мисол бўла олади.

Пойга ҳам саралаш баҳсида бўлгани цингари қизиқарли ва муросасиз руҳда ўтди. Феррари ва Мерседес болидлари ғолиблик учун даъвогарлик қилишди.

Поулни қўлга киритган британиялик Ҳемилтон стартда етакчиликни ўзида сақлаб қолган бўлсада биринчи питстопдан сўнг асосий рақиби Себастиан Феттелни олдинга ўтказиб юборди ва пойга якунига қадар Феррари болидига яқинлаша олмади.

3-поғона учун ҳам Мерседес ва Феррари жамоасининг финландиялик вакиллари Валтери Боттас ва Кими Райконен баҳс олиб боришди. Якунда Боттас 3-ўринни ўзида сақлаб қола олди ва шохсупага кўтарилди.

Ред Булл жамаоаси аъзоси Макс Ферстаппен бу гран прида ўз имконияти даражасида иштирок эта олмади 5-поғона билан чекланди. Унинг жамоадоши ва мезбон пойгачи Даниэл Риккиардо эса болиддаги муаммолар сабаб пойгани эрта якунлашга мажбур бўлди.

Шу тариқа 2012-йилдан буён илк марта Феттел яна турнир жадвалида пешқадамга айланди. Германиялик пойгачи италиян болидида ўзининг 4-ғалабасини қўлга киритди.