O‘zbekiston terma jamoasining JCH–2018 turniriga saralash bosqichi “A” guruhidagi raqibi – Janubiy Koreya terma jamoasi saralashning “B” guruhida ishtirok etayotgan Iroq futbolchilariga qarshi o‘rtoqlik o‘yini o‘tkazadi.
Mazkur uchrashuv 8 iyun kuni Dubay shahrida bo‘lib o‘tishi ko‘zda tutilgan. O‘rtoqlik o‘yinidan 5 kun keyin, ya’ni, 13 iyun sanasida Janubiy Koreya terma jamoasi saralash bosqichi 8-turida safarda Qatar bilan to‘qnash keladi. Iroq termasi o‘sha kuni o‘z maydonida Yaponiyani qabul qiladi.
Ma’lumot uchun, JCH–2018 turniriga saralash bosqichi “A” guruhi 7-turidan keyin Janubiy Koreya terma jamoasi 13 ochko to‘plagan holda Erondan (17 ochko) keyin ikkinchi o‘rinda bormoqda. O‘zbekiston terma jamoasi 12 ochko bilan uchinchi pog‘onani band qilgan. “B” guruhidagi Iroq termasi 7 ta o‘yinda 4 ochko jamg‘arib, 5-pog‘onani egallab turibdi.
