"Barselona" hujumchisi Neymar kecha La liganing navbatdagi turida "Granada" darvozasini ishg‘ol qilib, kataloniyaliklar libosida kiritgan gollari sonini 100 taga yetkazib oldi. Xo‘sh braziliyalik futbolchi bu natijaga qanday erishdi? Quyida bu haqda to‘xtalib o‘tamiz.

2013 yili "Santos"dan sotib olingan futbolchi ilk mavsumni ko‘ngildagidek o‘tkaza olmadi. Neymar La ligada atigi 9 ta gol urgan bo‘lsa, kubok o‘yinlarida 1 ta, Chempionlar ligasida 4 ta va boshqa turnirlarda 1 ta golga mualliflik qildi. Deyarli 100 million yevroga tushgan hujumchi uchun bir mavsumda 15 ta gol urish yaxshi natija emas edi, albatta. Boz ustiga, kataloniyaliklar mavsumni sovrinsiz yakunlashdi.

2014/2015 yilgi mavsum Neymarning faoliyatidagi eng omadlisi bo‘ldi. U Ispaniya chempionatida 22 ta gol urib, shaxsiy rekordini o‘rnatdi. Kubok o‘yinlarida 7 ta va Chempionlar ligasida 10 marta raqiblar posbonlarini ranjitdi. Hujumchi mavsumni 39 ta gol bilan yakunladi va "trebl"ga erishdi. Chempionlar ligasida Ronaldu va Messi bilan birgalikda eng yaxshi to‘purarga aylanish ham Neymar uchun fantastik natija edi.

Keyingi mavsumda Neymar chempionatda yana shaxsiy rekordini o‘rnatdi. U bu safar ispan jamoalari darvozalarini 24 marta "o‘q"qa tutishga muvaffaq bo‘ldi. Biroq braziliyalik kubok va Chempionlar ligasida o‘z darajasida to‘p sura olmadi. Ikki musobaqada urilgan 7 ta gol, uni mavsumni 31 ta gol bilan yakunlashiga sabab bo‘ldi.

Davomi >>