Yevropaning kuchli beshlik chempionatlarida mavsum oxirlab borayotgan bir paytda jamoalarni turli tasniflar orqali tahlil qilishga qiziqish ortmoqda. Shu asnoda Ispaniya La Ligasi, Germaniya Bundesligasi, Angliya Premyer Ligasi, Italiya A seriyasi va Fransiya 1 Ligasida ushbu mavsumda eng kam durang qayd etayotgan jamoalarni taqdim etamiz.
Kuchli beshlikning eng murosasiz jamoasi nomini ikki klub bo‘lishib turibdi va ularning ikkalasi ham Italiyada. A seriyaning 30 turi ortda qolgan bir vaqtda peshqadam «Yuventus» hamda ikkinchi o‘rindagi «Napoli» atigi ikki martadan durang o‘ynagan. E’tiborlisi ular aynan 30-turda o‘zaro o‘yinda durang qayd etdi va bungacha ularda faqatgina bittadan durang natija bor edi.
Ikkinchi o‘rinda uchtadan durang qayd etgan uchta jamoa bormoqda. Bular – Angliya Premyer Ligasi peshqadami «Chelsi», Fransiya 1 Ligasida 4-o‘rinda borayotgan «Lion» hamda Germaniya Bundesligasining yaqqol autsayderi, turnir jadvalida so‘nggi 18-o‘rinda borayotgan «Darmshtadt».
To‘rttadan durang hozircha biryo‘la 10 ta jamoa tomonidan qayd etilgan: La Ligada «Real Sosedad» (7-o‘rin), Bundesligada «RB Leypsig» (2-o‘rin), «Gerta» (6-o‘rin) va «Ingolshtadt» (17-o‘rin), Premyer Ligada «Kristal Pelas» (16-o‘rin) va «Suonsi» (17-o‘rin), A seriyada «Atalanta» (5-o‘rin), «Inter» (6-o‘rin) va «Sassuolo» (15-o‘rin) hamda 1 Ligada «Loryan» (19-o‘rin).
15 ta jamoa hozircha besh martadan murosa ko‘chasini tanlagan: La Liga, Bundesliga va 1 Liga peshqadamlari «Real», «Bavariya» va «Monako», shuningdek, bu chempionatlardan yana «Atletik», «Selta», «Verder», «Bayer», «Mayns», «PSJ» va «Kan», Premyer Ligadan «Byornli» va «Sanderlend» hamda A seriyadan «Kyevo», «Kalyari» va «Krotone».
6 ta durang shu paytgacha 13 ta jamoa tomonidan qayd etilgan bo‘lib, La Ligada «Barselona» va «Valensiya», Bundesligada «Borussiya» (Myonxengladbax), «Volfsburg» va «Gamburg», Premyer Ligada «Arsenal», «Lester», «Vest Hem» va «Hall Siti», A seriyada «Lasio», «Milan» va «Palermo», 1 Ligada esa «Anje» aynan shunday natija qayd etgan.
Umuman, kuchli beshlikning eng murosasiz chempionati Bundesliga bo‘lib turibdi: ushbu mavsumda hozircha atigi 55 ta durang qayd etilgan. Biroq Bundesligada boshqa chempionatlardan ko‘ra kam o‘yin o‘tkazilganini ham unutmaslik lozim – 18 jamoa ishtirok etadigan chempionatda ayni paytda 27-tur o‘yinlari davom etmoqda.
30-tur yakunlangan A seriyada hozircha 60 ta durang qayd etilgan va o‘yinlar/duranglar nisbatida aynan italyanlar yetakchilik qilmoqda. Shu paytgacha 69 ta durang qayd etilgan Premyer Ligada hozirda 31-tur davom etmoqda, biroq ikkinchi davra boshidan buyon ko‘plab o‘yinlar qoldirilgan.
30-turi boshlangan La Ligada hozirgacha jamoalar 74 marta durang o‘ynagan, bu yerda qoldirilgan o‘yin faqat bitta – «Selta» – «Real». Nihoyat eng ko‘p durang o‘ynalgan chempionat Fransiya 1 Ligasi: 79 ta. Ushbu musobaqada 31-tur yakunlangan, qoldirilgan o‘yinlarning jami soni esa 3 ta.
