Ispaniya chempionatining 30-turi doirasida "Barselona" o‘z maydonida "Sevilya"ni qabul qildi. Xorxe Sampaoli shogirdlari "ko‘k-anorranglilar"ga jiddiy qarshilik ko‘rsatishi kutilgandi, ammo andalusiyaliklarning qarshiligi bor-yo‘g‘i 25 daqiqa davom etdi xolos.

Dastlab Luis Suares chalqancha uslubda zarba berib, hisobni ochdi. Oradan ko‘p o‘tmasdan Lionel Messi raqib darvozasini ikki marta ishg‘ol qildi. Argentinalik futbolchi o‘zining birinchi golini qarshi hujum paytida, ikkinchisini burchak to‘pi o‘yinga kiritilganidan keyin urdi.

Ikkinchi bo‘limda "Barselona" kuchni tejagan holda o‘ynadi. Natijada mehmonlar bir nechta vaziyatlarga ega bo‘lishdi. Biroq Sarabiyaning zarbalarini Ter Shtegen qaytarishga muvaffaq bo‘ldi va o‘z darvozasi daxlsizligini saqlab qoldi.

Ushbu g‘alaba tufayli "Barsa" o‘z ochkolarini 69taga yetkazib, vaqtinchalik bo‘lsa-da, jadvalda 1-o‘ringa ko‘tarilib oldi.

Ispaniya La ligasi, 30-tur
"BARSELONA" - "SEVILYA" 3:0 (3:0)
5 aprel, 22.30, «Kamp Nou»
Gollar: 1:0 – 25 Suares, 2:0 – 28 Messi, 3:0 – 33 Messi.
Barselona – ter Stegen, Messi, Pike (Din, 77), Umtiti, Inyesta, Maskerano, Buskets, Rakitich (Alenya, 80), Serdji Roberto, Neymar, Suares (Pako Alkaser, 65).
Sevilya – Riko, Parexa, Langle, Eskudero, Merkado (Kranevitter, 46), Korrea, Nasri (Sarabiya, 46), Nzonzi, Iborra (Yovetich, 76), Vitolo, Mariano.
Ogohlantirishlar: Pike (15), Iborra (38), Vitolo (57), Buskets (71), Rakitich (78), Alenya (84).
Chetlatish: Vitolo (90+1).