«Dinamo» klubi sobiq futbolchisi 35 yoshli Sirojiddin Sayfiyev saraton kasalligiga chalingani e’lon qilingach, ayni vaqtda uni qo‘llab-quvvatlash uchun #TaslimBo‘lmaSiroj aksiyasi e’lon qilingan.
15 aprel, shanba kuni 6-tur doirasidagi «Dinamo» - «Buxoro» o‘yinida ham «Dinamo» stadionida «Siroj Samarqand sen bilan» xayriya aksiyasi o‘tkazildi. Shu kuni o‘yingoh darvozasi oldida qutilar tashkil etilgan edi.
Shu kuni «Dinamo» va «Buxoro» jamoalari ham futbolchini qo‘llab-quvvatlab, #BizSenBilanSiroj yozuvi ostidagi futbolkalarda maydonga tushib kelishdi.
Futbolchilik faoliyati davomida samarqandlik minglab muxlislarni o‘z o‘yinlari bilan xursand etgan Sirojiddin Sayfiyevning bugungi taqdiri «Dinamo» jamoasining hech bir ishqibozini bee’tibor qoldirmadi.
«Dinamo» - «Buxoro» (3:1) uchrashuvi yakunlangach, muxlislar faoli Shavkat Burhonov, «Dinamo» stadioni hisobchisi Yuliya Lagutina va «Dinamo» klubi matbuot kotibi Usmon Ibodov ishtirokida komissiya tuzilib, xolis muxlislar ko‘z o‘ngida yig‘ilgan 4 038 000 (to‘rt million o‘ttiz sakkiz ming) so‘m pul stadionning o‘zida Sirojiddin Sayfiyevning otasi Shamsiddin aka Sayfiyevga topshirildi. O‘z o‘rnida Shamsiddin aka ham barchaga o‘z minnatdorchiligini bildirdi.
Xalqimizning bunday g‘amxo‘rligi va eng asosiysi e’tibordan kishi dili ko‘tariladi. Shu o‘rinda Sirojidin Sayfiyevga Xudodan shifo tilab qolamiz. Biz sen bilan Siroj!
