UZREPORT TV futbol muxlislariga FUTBOL TV telekanalining efirga uzatilishi kechikkani tufayli bayonot berdi.
«Bugun FUTBOL TV telekanalini ishga tushirib, futbol muxlislari uchun tuhfa sifatida "El Klasiko" bahsini UZREPORT TV va FUTBOL TV telekanallarida parallel ravishda namoyish qilishni rejalashtirgandik.
Ammo Toshkent teleminorasidagi uzatkichlarda ro‘y bergan ayrim texnik muammolar sababli bu rejamiz amalga oshmay qoldi. Ushbu muammolar boshqa telekanallar, shu jumladan, UZREPORT TV telekanalining signaliga salbiy ta’sir ko‘rsatdi.
Shu sababli "El Klasiko" bahsi yakuniga yetgandan so‘ng FUTBOL TV telekanalini texnik sozlash ishlari davom ettiriladi. Texnik muammolar bartaraf etilgach, FUTBOL TV telekanali avval e’lon qilingandek test rejimida efirga uzatib boriladi.
Yuzaga kelgan noqulayliklar uchun uzr so‘raymiz! Biz bilan birgalikda jahon va Yevropaning qiziqarli futbol uchrashuvlarini tomosha qilib boring!» - deyiladi bayonotda.