Angliya futbol assosiasiyasi (FA) «Sanderlend» bosh murabbiyi Devid Moyes ustidan intizomiy ish ochdi.

FA shotlandiyalik 54 yoshli mutaxassisni ahloq me’yorlarini qo‘pol buzganlikda aybladi.

Eslatib o‘tamiz, Devid Moyes BBC jurnalisti Viki Sparksga nisbatan qo‘pollik qilgan edi. Jurnalist ayol APL 29-turidan o‘rin olgan «Byornli»ga (0:0) qarshi o‘yindan so‘ng murabbiyni noqulay ahvolga solgan. Xususan u, «Sanderlend» xo‘jayini Ellis Shortning stadionga tashrif buyurishi Moyesning kelajagini so‘roq ostiga qo‘yadimi, degan savol bilan murojaat qilgan.

Moyes matbuot-anjumanidan keyin Sparks yoniga kelib: «Bu juda qo‘pol gap bo‘ldi, o‘zingga ehtiyot bo‘l. Ayol kishi bo‘lishingga ham qarab turmayman, tarsaki yeb qolishing mumkin. Keyingi safar savol berayotganingda o‘ylab gapir» - degan. Sparks murabbiyning bu gaplarini bildirmasdan yozib olishga muvaffaq bo‘lgan, ammo uning ustidan hech qayerga shikoyat qilmagan. Ammo voqeadan xabar topgan BBC rahbari Moyesga qo‘ng‘iroq qilib, uni muxbirni qo‘rqitishda ayblagan va sudga murojaat qilishini aytgan. Keyinroq Moyes ayolga qo‘ng‘iroq qilib, kechirim so‘ragan. Sparks ham, BBC ham murabbiyning uzrini qabul qilgan.

Ammo bu voqea matbuotda oshkor bo‘lib ketgach, FA mutaxassis ustidan ish ochishga qaror qildi. Endi Moyes bu ayblovga 3 may kunigacha javob berishi kerak.